រោងចក្រផលិតស្ករសដ៏ធំជាងគេមួយនៅអាស៊ី គ្រោងនឹងសម្ពោធឲ្យដំណើរការជាផ្លូវការនៅថ្ងៃនេះហើយ ។ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា គ្រោងនឹងអញ្ជើញជាអធិបតីភាពក្នុងកម្ម វិធីសម្ពោធរោងចក្រផលិតស្ករសតម្លៃ ៣៦០លានដុល្លារ ដែលផលិតពីការចម្រាញ់កៀបទឹកអំពៅ ។ ពិធីសម្ពោធរោងចក្រផលិតស្ករនៃក្រុមហ៊ុនចិន Rui Feng (Cambodia) International Co. Ltd នឹងធ្វើនៅស្រុកឆែប ខេត្តព្រះវិហារ នាព្រឹកថ្ងៃទី១៩ ខែមេសា ឆ្នាំ ២០១៦ ។
រោងចក្រនេះ ត្រូវបានគេរំពឹងថា អាចមានសមត្ថភាពផលិតស្ករស បានជាង ១ពាន់តោន ក្នុងមួយថ្ងៃ ជាមួយនឹងចម្ការអំពៅដែលបានដាំដុះរួចរាល់ចំនួន ១ម៉ឺន ៣ពាន់ហិកតា ។ សេចក្តីរាយការណ៍បានបញ្ជាក់ថា ក្នុងមួយថ្ងៃ ក្រុមហ៊ុនត្រូវការអំពៅចូលក្នុងរោងចក្រចំនួន ២ម៉ឺនតោន ដើម្បីកិន និងចម្រាញ់យកស្ករស ហើយក្នុងមួយថ្ងៃរោងចក្រអាចទទួលបានស្ករសរហូតដល់ជាង ១ពាន់តោន សម្រាប់ចែកចាយទីផ្សារក្នុងស្រុក និងអន្តរជាតិ ។
រោងចក្រផលិតស្ករសនោះ គឺជារោងចក្រធំជាងគេលើពិភពលោក ដែលបានបោះទីតាំងក្នុងខេត្តព្រះវិហារ និងបានបោះទុនវិនិយោគប្រមាណ ១ពាន់លានដុល្លារអាមេរិក ដោយវិនិយោគិនជនជាតិចិន ។ ដោយឡែក ចម្ការអំពៅដែលគាំទ្រសម្រាប់សង្វាក់ផលិតកម្មរោងចក្រនេះ មាននៅ ៣ស្រុកនៃខេត្តព្រះវិហារ និងអនុវត្តដោយក្រុមហ៊ុនចំនួន ៥រួមគ្នា ។ រោងចក្រនេះបានចាប់ផ្ដើមសាងសង់តាំងពីពាក់កណ្ដាលខែមិថុនា ឆ្នាំ ២០១៤ មកម្ល៉េះ ។ បន្ទាប់ពីរោងចក្រនេះដំណើរការរលូនហើយនោះ គេរំពឹងថា នឹងអាចជួយជំរុញកំណើនសេដ្ឋកិច្ចកម្ពុជាបានមួយផ្នែក ជាពិសេសការផ្ដល់ការងារយ៉ាងច្រើនដល់ប្រជាពលរដ្ឋកម្ពុជា ។