សៀមរាប​ ៖ ​ប្រធាន​សហភាព​សហព័ន្ធ​យុវជន​កម្ពុជា​ឯកឧត្ដម ​ហ៊ុន​ ម៉ា​នី​បាន​មានប្រសាសន៍ថា ចំពោះ​អ្នក​រិះគន់​រឿង​សំរាម​នៅ​ក្នុង​ព្រឹត្តិការណ៍​អង្គរ​សង្ក្រាន្ត ​គឺ​ដោយសារតែ​ពួកគាត់​មិនបាន មក​រើស​សំរាម​ដោយ​ខ្លួនឯង​។​
​ឯកឧត្ដម ​ថ្លែង​បែបនេះ​កាលពី​ព្រឹក​ថ្ងៃ​ទី​១៧​ខែ​មេសា​ នៅ​មុខ​ប្រាសាទអង្គរវត្ត ក្នុង​ឱកាស​ដែល​ឯកឧត្ដម​ជួប​ថ្លែងអំណរគុណ​ដល់​ក្រុម​អ្នក​បោសសម្អាត​សំរាម​ ប្រមាណ​ជិត​៥០០​នាក់ មកពី​ក្រុមហ៊ុន​ប្រមូល​សំរាម​ក្រុម​គ្រឹះស្ថាន​អង្គរ និង​យុវជន​ស្ម័គ្រចិត្ត​ខេត្ត​ស្វាយរៀង ។​
​លោក​ហ៊ុន​ម៉ា​នី​បាន​មានប្រសាសន៍ថា សម្រាប់​ព្រឹត្តិការណ៍​អង្គរ​សង្ក្រាន្ត​ឆ្នាំ​២០១៦​នេះ របាយការណ៍​របស់​ក្រសួង​ទេសចរណ៍​បាន​បង្ហាញ​ថា​ មាន​ភ្ញៀវ​រហូតដល់​ទៅ​មួយ​លាន​បី​សែន​នាក់​មក​ចូលរួម​ ដូច្នេះ​សំរាម​ក៏​ច្រើន​តាម​ហ្នឹង​ដែរ​។ ​ដូច្នេះ​បើ​គ្មាន​បងប្អូន​ចូលរួម​បោសសម្អាត​សំរាម​ទាំង​យប់​ទាំង​ថ្ងៃ​ទេ​ ក៏​មិន​អាច​ទៅ​រួច​ដែរ​។​
​សូម​បញ្ជាក់​ថា​នៅ​ថ្ងៃ​ចុង​ក្រោយ​ នៃ​ព្រឹត្តិការណ៍​អង្គរ​សង្ក្រាន្ត គឺ​ថ្ងៃ​ទី​១៦​ខែ​មេសា​ឆ្នាំ​២០១៦ ​តាមរយៈ​បណ្ដាញ​សង្គម​នានា មានការ​បង្ហោះ​នូវ​រូបភាព​សំរាម​និង​សារ​រិះគន់​ជាច្រើន ដែល​មានន័យ​ប្រហាក់​ប្រហែល​គ្នា​ថា ​អាជ្ញាធរ ក៏ដូចជា​ក្រុម សហភាព​សហព័ន្ធ​យុវជន​កម្ពុជា​ថា មិនបាន​គិតគូរ​ពី​សោ​ភណ្ឌ​ភាព​ប្រាង្គ​ប្រាសាទ​បុរាណ​ និង​អនាម័យ ។​​
​ចំពោះ​ការរិះគន់​នេះ សមាជិក​ក្រុម​បោសសម្អាត​បាន​ឲ្យ​ដឹង​ថា​ ការពិត​រូបភាព​ដែល​គេ​បង្ហោះ​តាម​បណ្ដាញ​សង្គម គឺជា​រូបភាព​ដែល​ក្រុម​របស់​គាត់​មិនទាន់​ដល់ពេល​ចូល​ទៅ​សម្អាត​។​គាត់​ និយាយ​ថា ចំពោះ​បញ្ហា​សំរាម​នៅ​ក្នុង​បរិវេណ​ប្រាសាទ និង​នៅ​កន្លែង​ដែល​មាន​លេងល្បែង​កម្សាន្ត គឺ​ពួកគាត់​បាន​ប្រមូល​ស្ទើរតែ​អស់​តាំងពី​យប់​មក​ម្ល៉េះ​ ហើយ​នៅ​សេសសល់​បន្តិចបន្តួច​ពួកគាត់​បាន​ប្រមូល​តាំងពី​ម៉ោង​៤​ទៀបភ្លឺ​បន្តទៀត​ ៕