មន្ទីរសាធារណការរាជធានីភ្នំពេញ បានកោះប្រជុំក្រុមហ៊ុនស្ថាបនាផ្លូវ លូ ស្ថានីយ៍បូមទឹកក្នុងរាជធានីភ្នំពេញ ដើម្បីពង្រឹងគុណភាពការងារ ។ ការកោះហៅក្រុមហ៊ុនស្ថាបនាផ្លូវលូទាំងនេះមកជួបជុំ គឺនៅក្រោយប្រសាសន៍ ស្តីបន្ទោសបញ្ហារបស់សម្ដេចតេជោនាយករដ្ឋមន្ត្រី ទាក់ទងនឹងការជួសជុលថ្នល់ លូ តាមផ្លូវដែលធ្វើឱ្យប្រជាពលរដ្ឋថ្នាំងថ្នាក់ ។
ប្រធានមន្ទីរសាធារណការរាជធានីភ្នំពេញ លោក សាំ ពិសិដ្ឋ នៅថ្ងៃទី៧ ខែមេសានេះ បានប្រាប់អង្គភាពស្ពានថ្នល់ និងការិយាល័យសាធារណការ ត្រូវបែងចែកគ្នាចំនួន ៦ក្រុម ដោយចាត់មន្ត្រីជាវិស្វករចុះតាមដានការងារគ្រប់ការដ្ឋាន និងចុះកម្លាំងជួសជុលគ្រលុកសំបុកមាន់ ក្នុងរាជធានីភ្នំពេញ ។ ជាមួយគ្នានោះ សាធារណការរាជធានីភ្នំពេញ បានបញ្ជាពិនិត្យការកៀរដី និងសំរួលចរាចរផ្លូវកប់ស្រូវ… ការចុះជួសជុលបន្ទាន់ផ្លូវលេខ១១០ ព្រែកប្រា ខណ្ឌច្បារអំពៅ ចាប់ពីពេលនេះតទៅ ។
គួរកត់សម្គាល់ថា ក្រោយការស្តីបន្ទោសរបស់សម្ដេចតេជោ ការងារជួសជុលផ្លូវចំនួន ៤ខ្សែ ត្រូវគេឃើញបានធ្វើកាលពីថ្ងៃទី៦ ខែមេសា ដូចជា ផ្លូវជាតិលេខ៥ ចាប់ពីស្ពានជ្រោយចង្វារដល់ស្ពានព្រែកព្នៅ… ផ្លូវលេខ៥៧ ចាប់ពីមហាវិថីព្រះសីហនុដល់មហាវិថីម៉ៅសេទុង… ផ្លូវលេខ២៨៨ ចាប់ពីផ្លូវលេខ៥១ ដល់ផ្លូវលេខ៦៣ និងផ្លូវលេខ៦៣ ចាប់ពីមហាវិថីព្រះមុនីវង្សដល់ផ្លូវលេខ១៦៣ ។
ដោយឡែកកំណាត់ផ្លូវវេងស្រេងដែលជាផ្លូវខ្សែក្រវ៉ាត់រាជធានី ដែល សម្តេចតេជោសែន បានជួយលើការសម្រួលដកចេញនូវការបង់ថ្លៃបញ្ជរ ត្រូវបានគេចាក់ដីបិទរារាំងកំណាត់ផ្លូវខ្សែក្រវ៉ាត់ក្រុងនោះ ប្រមាណជាង ២ខែមកហើយ ក្រោមរូបភាពជួសជុលដាក់លូ ។ ការចាក់ដីបិទកំណាត់ផ្លូវខ្សែក្រវ៉ាត់ក្រុងនោះ បានធ្វើអោយមានការកកស្ទះចរាចរណ៍ដល់ផ្លូវខ្សែក្រវ៉ាត់ក្រុង… ហើយការជួសជុលមិនចេះចប់មិនចេះហើយនោះ បានរងការរិះគន់ពីសាធារណជន ដោយសារតែភាពធ្វើមិនដឹងមិនឮ របស់មន្ត្រីទទួលខុសត្រូវ និងបញ្ហានោះ ត្រូវគេឃើញបាននាំឱ្យប្រជាជនខឹងសម្បារ ហើយបែរជានិយាយចោទប្រកាន់លើការដឹកនាំ របស់ថ្នាក់ដឹកនាំរាជរដ្ឋាភិបាលទៅវិញ ។