ភ្ញៀវទេសចរណ៍បរទេសជាង ២ពាន់នាក់ បានចូលកំសាន្តក្រុងព្រះសីហនុ នៅថ្ងៃទី៥ ខែមេសានេះ តាមនាវាបរទេសមួយគ្រឿងឈ្មោះ Queen Mary II ។ នាវាទេសចរណ៍ដែលផ្ទុកអ្នកដំណើរចំនួន ២.៣៩៨នាក់ និងនាវិក ១.២៧១ នាក់ បានធ្វើដំណើរទស្សនាកំសាន្ត នៅតំបន់ទេសចរណ៍សំខាន់ៗមួយចំនួន ស្ថិតក្នុងក្រុងព្រះសីហនុ ជាប់មាត់សមុទ្រនេះ។
ភ្ញៀវទេសចរណ៍នៅលើនាវា ភាគច្រើនគឺជនជាតិអង់គ្លេស មានចំនួន ៨០៥នាក់… ទេសចរណ៍អូស្ត្រាលី៧៣៤នាក់ និងទេសចរណ៍អាម៉េរិក ២០០នាក់ ។ នាវាទេសចរណ៍នេះ បានចាកចេញពីកំពង់ផែស្វយ័តក្រុងព្រះសីហនុ នៅម៉ោង ៧យប់ថ្ងៃដដែល ក្នុងដំណើរបន្តឆ្ពោះទៅកាន់កំពង់ផែប្រទេសសឹង្ហបូរី ។
សេចក្តីរាយការណ៍ពីសមត្ថកិច្ចនគរបាលប៉ុស្តិ៍ច្រកទ្វារកំពង់ផែសមុទ្រ ខេត្តព្រះសីហនុ បានឱ្យដឹងថា នៅក្នុងរយៈពេល ៣ខែ ឆ្នាំ ២០១៦នេះ មាននាវាដឹកអ្នកទេសចរណ៍ ចូលមកចតនៅក្នុងកំពង់ផែសមុទ្រខេត្តព្រះសីហនុ មានចំនួន ២៤គ្រឿង… និងមានចំនួនភ្ញៀវទេសចរណ៏ចំរុះជាតិសាសន៏ចូលទស្សនាចំនួន ២៩.៦២៩នាក់។ សេចក្តីរាយការណ៍បានប្រៀបធៀបថា រយៈពេល ៣ខែដើមឆ្នាំ ២០១៥ គឺមាននាវាទេសចរណ៍ចូលចតតែ ១៧គ្រឿង និងមានអ្នកទេសចរណ៍ចំនួន១៥.៥៣៨នាក់ ប៉ុណ្ណោះ ។