កីឡាបាល់ទាត់វ័យក្មេងកម្ពុជា ទទួលបានមេដាយមាសជាលើកដំបូង ក្នុងប្រវត្តិសាស្ត្រក្នុងការប្រកួតរវាងប្រទេសនៅតាមតំបន់ទន្លេមេគង្គ ។
ការប្រកួតកីឡាមេគង្គសុឆន្ទះ Goodwill Mekong Games លោកទី១២ បានប្រារព្ធនៅក្នុងខេត្តឈៀងរ៉ៃ របស់ថៃ ចាប់តាំងពីថ្ងៃទី២២មីនា ។ កម្ពុជាបានបញ្ជូនក្រុមអត្តពលករចំនួន៦វិញ្ញាសារ ចូលរួម និងទាំងក្រុមប្រកួតទាំង៦ វិញ្ញាសារ បានទទួលនូវមេដាយជោគជ័យទាំងអស់គ្នា ។ រហូតមកដល់ថ្ងៃ២៤ ខែមិនានេះ កម្ពុជាត្រូវគេឃើញបានទទួលមេដាយ ២១ហើយ ក្នុងនោះមេដាយមាស១២ ប្រាក់៥ និងសំរឹទ្ធ៤ ។
យោងតាមទំព័រ facebookរបស់អនុរដ្ឋលេខាធិការក្រសួងអប់រំយុវជន និងកីឡា ឯកឧត្តម ប៊ូ ជុំសេរី ដែលដឹកនាំក្រុមកីឡាទៅចូលរួម បានឲ្យដឹងថា ប្រភេទកីឡា ដែលកម្ពុជាទទួលបាន មានវិញ្ញាសាប៉េតង់ ដែលលទ្ធផល បានមេដាយ៥ ក្នុងនោះមេដាយមាស២ ប្រាក់១ និងសំរិទ្ធ២ ។ វិញ្ញាសាបាល់ទាត់ដែលប្រកួតចប់លទ្ធផល គឺកម្ពុជាទទួលបានមេដាយមាស១ ដែលជាមេដាយមាសលើកដំបូង សម្រាប់ប្រវត្តិសាស្ត្របាល់ទាត់របស់កម្ពុជា ក្នុងតំបន់នៃក្រុមកីឡាបាល់ទាត់អាយុក្រោម ១៩ឆ្នាំ ដោយបានប្រកួតស្មើជាមួយថៃ ៣ទល់៣… បានយកឈ្នះប្រទេសមីយ៉ាន់ម៉ា៧ ទល់០ និងយកឈ្នះឡាវ៥ ទល់១ ។ ចំណែកវិញ្ញាសាវាយសីវិញ គឺកម្ពជាទទួលបានមេដាយ៥ ក្នុងនោះមេដាយមាស៤ និងប្រាក់១ ។ វិញ្ញាសា សីប៉ាតាក្រ កម្ពុជាទទួលបានមេដាយសំរឹទ្ធ១ ។ ដោយឡែកវិញ្ញាសាប៉េងប៉ុង គឹកម្ពុជាទទួលបានមេដាយ៣ ក្នុងនោះមេដាយមាស២ ប្រាក់១ ។ ចំណែកវិញ្ញាសាកីឡាប្រពៃណី គឺកម្ពុជាទទួលបានមេដាយ៦ ក្នុងនោះមេដាយមាស៣ ប្រាក់២ និងសំរិទ្ធ១ ។
ការប្រកួតកីឡា Mekong Good Will Games លើកទី១២ នៅឆ្នាំ ២០១៦ នេះ គឺមានប្រទេសចូលរួមមានតែ ៥ប្រទេស ចូលរួមគឺ មីយ៉ាន់ម៉ា ថៃ ឡាវ កម្ពុជា និងវៀតណាម ប៉ុន្តែឆ្នាំនេះវៀតណាមអវត្តមាន ។
