កម្ពុជា និងរុស្ស៊ី នៅសប្តាហ៍ក្រោយនេះ គ្រោងនឹងបើកកិច្ចប្រជុំលើកទី៩ នៃគណៈកម្មការអន្តររដ្ឋាភិបាលកម្ពុជា-រុស្ស៊ី សម្រាប់កិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេស ។ កិច្ចប្រជុំរវាងប្រទេសទាំង២ នៅថ្ងៃទី២៩ ខែមីនា ខាងមុខនេះ នឹងធ្វើនៅក្រសួងការបរទេសកម្ពុជា រវាងរដ្ឋមន្ត្រីក្រសួងការបរទេសកម្ពុជា ឯកឧត្តមឧបនាយករដ្ឋមន្ត្រី ហោ ណាំហុង ជាមួយនឹងរដ្ឋមន្ត្រីក្រសួងគមនាគមន៍ និងព័ត៌មាន នៃសហព័ន្ធរុស្ស៊ី ឯកឧត្តម នីកូឡៃ នីគីហ្វូរ៉ូហ្វ ដែលនឹងអញ្ជើញមកដល់កម្ពុជាសប្តាហ៍ក្រោយ ។
យោងតាមក្រសួងការបរទេសកម្ពុជា កិច្ចប្រជុំនាសប្តាហ៍ក្រោយនេះ ក៏នឹងមានការចុះហត្ថលេខាលើពិធីសារ នៃកិច្ចប្រជុំលើកទី៩ នៃគណៈកម្មការអន្តររដ្ឋាភិបាលកម្ពុជា-រុស្ស៊ី សម្រាប់កិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេសផងដែរ ។
ដំណើររបស់រដ្ឋមន្ត្រីរុស្ស៊ីនាសប្តាហ៍ក្រោយ គឺជាដំណើរទស្សនកិច្ចបន្តមួយ បន្ទាប់ពីទស្សនកិច្ចរបស់លោកកាលពីខែកក្កដា ឆ្នាំ ២០១៥ ដែលពេលនោះ លោកបានអញ្ជើញជួបសម្តេចនាយករដ្ឋមន្ត្រី និងមន្ត្រីជាន់ខ្ពស់មួយចំនួនរបស់រាជរដ្ឋាភិបាលកម្ពុជា ។ សេចក្តីរាយការណ៍បានបង្ហាញថា ក្នុងដំណើរទស្សនកិច្ចកាលពីខែកក្កដា ឆ្នាំ ២០១៥ សម្តេចតេជោនាយករដ្ឋមន្រ្តី ហ៊ុន សែន បានស្នើរដ្ឋមន្ត្រីក្រសួងគមនាគមន៍រុស្ស៊ី នីកូឡៃ នីគីហ្វូរ៉ូហ្វ ជម្រុញការហោះហើរផ្ទាល់ពីរុស្ស៊ី មកកម្ពុជា ដើម្បីបង្កើនវិស័យទេសចរណ៍វិនិយោគរវាងប្រទេសទាំង២ ។
សេចក្តីរាយការណ៍បានឱ្យដឹងថា កម្ពុជាកំពុងត្រៀមចរចារកកិច្ចព្រមព្រៀងជាមួយសហភាពសេដ្ឋកិច្ច Eurasia ដែលនឹងជួយជម្រុញទំនាក់ទំនងរវាងរុស្ស៊ី… រវាងប្រទេសជាសមាជិកនៃសហភាពសេដ្ឋកិច្ច Eurasia និងប្រទេសកម្ពុជាផងដែរ ។ សហភាពសេដ្ឋកិច្ច Eurasia គឺជាសហភាពសេដ្ឋកិច្ចនៃបណ្តាប្រទេសដែលស្ថិតនៅភាគខាងជើងអឺរ៉ុប និងអាស៊ី ដែលមានប្រជាជនសរុបចំនួនប្រមាណ ១៨៣លាននាក់ និងដែលមាន GDP ផលទុនក្នុងស្រុកសរុបជាង ៤ទ្រីលានដុល្លារអាមេរិក ។
ក្នុងដំណើរទស្សនកិច្ចកាលពីខែកក្កដា ឆ្នាំ ២០១៥ កន្លងមកនោះផងដែរ រដ្ឋមន្ត្រីរុស្ស៊ី ឯកឧត្តម នីកូឡៃ នីគីហ្វូរ៉ូហ្វ បានបញ្ជាក់ការសន្យាប្រឹងប្រែង ដើម្បីបង្កើនពាណិជ្ជកម្មទៅវិញទៅមក រវាងប្រទេសទាំង២ ដោយរុស្ស៊ី នឹងលើកទឹកចិត្តក្រុមហ៊ុនវិនិយោគទុនធំៗរបស់ខ្លួន ដើម្បីធ្វើការពិចារណាការបណ្តាក់ទុន និងការធ្វើជំនួញក្នុងប្រទេសកម្ពុជា ។ បច្ចុប្បន្នវិនិយោគទុនរបស់រុស្ស៊ី ក្នុងប្រទេសកម្ពុជា បានស្ថិតក្នុងចំណោម Top Ten នៃការធ្វើជំនួញនៅកម្ពុជា ដែលភាគច្រើនត្រូវគេឃើញតាមរយៈការវិនិយោគមុខរបរសណ្ឋាគារ និងរមណីយដ្ឋាន ។
