ក្រោយទទួលបានព័ត៌មាន ស្តីពីរថយន្ដដឹកកម្មករ កម្មការនីកាត់ដេរទទួលគ្រោះថ្នាក់ចរាចរណ៍ ឯកឧត្តមអភិបាល គួច ចំរើន នៅវេលាថ្ងៃត្រង់នេះ បានចុះពិនិត្យ្តមើលស្ថានភាពកម្មករ កម្មការនី កាត់ដេរដែលរងគ្រោះដោយគ្រោះថ្នាក់ចរាចរណ៍ នៅព្រឹក ថ្ងៃទី១២ ខែសីហា ឆ្នាំ២០១៧ រវាងឡានដឹកកម្មករ និងឡាន ដឹកធ្យូងនៅភូមិគោករវាង ឃុំខ្នុរដំបង ស្រុកជេីងព្រៃ បណ្តាល ឲ្យកម្មករ កម្មការនីរបួសចំនួន ២៦នាក់ និងអ្នកបើកបរឡានដឹកធ្យូង ម្នាក់ បានបញ្ជូនចូលសំរាកនៅមន្ទីរពេទ្យបង្អែកស្រុកជើងព្រៃ។
ឯកឧត្តមអភិបាលខេត្ត បានស្នើឲ្យក្រុមគ្រូពេទ្យ ត្រូវយក ចិត្តទុកដាក់ពិនិត្យព្យាបាលបងប្អូនកម្មករ កម្មការនីឲ្យបានល្អ។ ហើយឥឡូវនេះ មានកម្មករ កម្មការនី ០៦នាក់ ត្រូវបានបញ្ជូន ទៅព្យាបាលនៅភ្នំពេញ ដោយសារមានសភាពធ្ងន់ធ្ងរ ដូច្នេះនៅសល់តែ ២០នាក់ ដែលកំពុងសម្រាកព្យាបាលនៅមន្ទីរពេទ្យបង្អែកស្រុកជើងព្រៃ។
ជាមួយគ្នានេះដែរ ឯកឧត្តមអភិបាលខេត្ត ក៏បាននាំយកនូវ អំណោយ ជាថវិការរបស់ សម្តេចតេជោ ហ៊ុន សែន និង សម្តេចគតិព្រឹទ្ធបណ្ឌិត ប៊ុនរ៉ានី ហ៊ុន សែន ជូនដល់បង ប្អូនកម្មការី ដែលកំពុងរងគ្រោះនូវថវិកា១០ម៉ឺនរៀលក្នុងម្នាក់។ ក្រៅពីកម្មការីរងគ្រោះ ឯកឧត្តមអភិបាល ក៏បានផ្តល់ជូន ថវិកាដល់អ្នកជម្ងឺផ្សេងទៀត ក្នុងម្នាក់ទទួលបាន៥ម៉ឺនរៀល ផងដែរ។
