រដ្ឋាភិបាលជប៉ុន នឹងចុះហត្ថលេខាជាមួយរដ្ឋាភិបាលកម្ពុជា នៅដើមសប្តាហ៍ក្រោយ លើការផ្តល់ជំនួយហិរញ្ញប្បទានឥតសំណង និងឥណទានសម្បទាន ដែលមានតម្លៃសរុប ២ម៉ឺន ២០១៣ លានយ៉េន ស្មើនឹងជាង១៩៤ លានដុល្លារអាម៉េរិក ។
យោងតាមក្រសួងការបរទេសកម្ពុជា ការចុះហត្ថលេខាផ្តល់ប្រាក់ជំនួយនេះ នឹងប្រព្រឹត្តទៅនៅរសៀលថ្ងៃទី២១ ខែមីនា ឆ្នាំ ២០១៦ នៅក្រសួងការបរទេសកម្ពុជា រវាងរដ្ឋមន្ត្រីការបរទេសកម្ពុជា និងឯកអគ្គរដ្ឋទូតជប៉ុន ប្រចាំកម្ពុជា ដោយមានវត្តមានដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ។
ក្រសួងការបរទេសកម្ពុជាបានបញ្ជាក់ថា ក្នុងប្រាក់ជំនួយ ២ម៉ឺន ២០១៣ លានយ៉េន គឺប្រាក់ហិរញ្ញប្បទានឥតសំណងមានចំនួន ៤៧១៥លាន សម្រាប់គម្រោងធ្វើឱ្យប្រសើរនូវស្ពានជ្រោយចង្វារ និងជំនួយសម្ភារៈបច្ចេកទេសបោសសំអាតមីនដំណាក់កាលទី៧ ។ ចំណែកជំនួយឥណទានសម្បទានវិញ មានចំនួន ១ម៉ឺន ៧ពាន់ ២៩៨ លានយ៉េន សម្រាប់គម្រោងធ្វើឱ្យប្រសើរផ្លូវជាតិលេខ៥ ពីកំណាត់ផ្លូវព្រែកក្តាមរាជធានីភ្នំពេញ ដល់ធ្លាម្អម ស្រុកក្រគរខេត្តពោធិសាត់ ដំណាក់កាលទី២ ។