ប្រទេសស្វីស បានចុះហត្ថលេខាជាមួយនឹងរាជរដ្ឋាភិបាលកម្ពុជា ដោយបានសន្យាគាំទ្រកិច្ចសហប្រតិបត្តិការបច្ចេកទេស ហិរញ្ញវត្ថុ សេដ្ឋកិច្ច និងជំនួយមនុស្សធម៌ ។ ការចុះហត្ថលេខានៅថ្ងៃទី១៥ ខែមីនា ឆ្នាំ ២០១៦ បានធ្វើឡើងរវាង ឯកអគ្គរដ្ឋទូតស្វីស ឯកឧត្តម Ivo Sieber ជាមួយនឹងរដ្ឋមន្ត្រីក្រសួងការបរទេសកម្ពុជា ឯកឧត្តមឧបនាយករដ្ឋមន្ត្រី ហោ ណាំហុង នៅទីស្តីការក្រសួងការបរទេស ។
ក្រសួងការបរទេសកម្ពុជាបានអោយដឹងថា ការចុះហត្ថលេខាព្រមព្រៀងនេះ គឺជាបញ្ជាក់ការប្តេជ្ញារបស់ប្រទេសស្វីស ដែលបន្តជួយដល់ការអភិវឌ្ឍន៍កម្ពុជា ។ បច្ចុប្បន្ន ជំនួយហិរញ្ញវត្ថុប្រចាំឆ្នាំរបស់ស្វីសចំពោះកម្ពុជា មានចំនួន ១២លានហ្វ្រង់ស្វីស ដែលស្មើនឹង ១២លានដុល្លារអាមេរិក ។
ជំនួយ ១២លានហ្វ្រង់ស្វីស ក្នុងមួយឆ្នាំៗនោះ ផ្តោតលើអភិបាលកិច្ចមូលដ្ឋាន និងការចូលរួមរបស់ពលរដ្ឋ ផ្នែកកសិកម្ម និងសន្តិសុខស្បៀង ការអភិវឌ្ឍន៍ជំនាញនិងការងារ និងមន្ទីរពេទ្យគន្ធបុប្ឆា ។
សូមជំរាបថា រដ្ឋាភិបាលស្វីស បានជួយគាំទ្រមន្ទីរពេទ្យគន្ធបុប្ឆា ចាប់តាំងពីឆ្នាំ ១៩៩៤ ក្នុងថវិកាសរុបចំនួន ៥៥លានហ្វ្រង់ស្វីស ហើយ ។