មន្រ្តីកងទ័ពកម្ពុជា និងមន្រ្តីកងទ័ពអាម៉េរិក បានបើកជាផ្លូវការនូវសមយុទ្ធឆ្មាំអង្គរ ២០១៦ ដែលមានកម្លាំងទាហាន ១៥០នាក់ បានចូលរួម ។ សមយុទ្ធបានចាប់ផ្តើម សាលាហ្វឹកហ្វឺនសំរាប់កងកំលាំងថែរក្សាសន្តិភាព ពហុជាតិក្នុងខេត្តកំពង់ស្ពឺនៅថ្ងៃទី ១៤ មិនាឆ្នាំ ២០១៦ ។ នេះគឺជាសមយុទ្ធយោធាទ្វេភាគីប្រចាំឆ្នាំ ដែលមានរយៈពេល ២សប្តាហ៍ ដោយមានការចូលរួមពីកម្លាំងកងយោធពលខេមរភូមិន្ទ… កងកម្លាំងមកពីមជ្ឈមណ្ឌលជាតិសម្រាប់ថែរក្សាសន្តិភាព… មជ្ឈមណ្ឌលកំចាត់មីន និងកងរាជអាវុធហត្ថកម្ពុជា ។
ចំណែកកងកំលាំងអាម៉េរិក មានមកពីកងទ័ពជើងគោកប្រចាំនៅតំបន់ប៉ាស៊ីហ្វិក… បញ្ជាការដ្ឋានសំរាប់ជំនួយដល់តំបន់ប្រតិបត្តិការសឹកកងពលតូចវិស្វកម្មទី១៣០ សំរាប់តំបន់ប្រតិបត្តិការសឹក… កងពលតូចតម្រួតយោធាទី៨… កងវរសេនាតូចកំចាត់យុទ្ធភណ្ឌផ្ទុះទី៣០៣… កងកំលាំងជាតិការពារមាតុភូមិមកពីរដ្ឋ Idaho… បញ្ជាការដ្ឋានទី១៨ ផ្នែកវេជ្ជសាស្រ្ត… មជ្ឈមណ្ឌលរំលាយយុទ្ធភណ្ឌផ្ទុះកែច្នៃ និងកងពលតូចទី៤១៣ ទទួលបន្ទុកកិច្ចការកុងត្រា ។
ស្ថានទូតអាម៉េរិក ប្រចាំនៅកម្ពុជាបានឲ្យដឹងថា ឆ្នាំនេះគឺជាឆ្នាំទី៧ ជាប់គ្នានៃសមយុទ្ធ ដែលមានបំណងពង្រឹងរួមគ្នា នូវសមត្ថភាពក្នុងការផ្តល់ជំនួយសង្គ្រោះមហន្តរាយ និងជំនួយមនុស្សធម៌ និងកែលំអកិច្ចសហប្រតិបត្តិការរវាងយោធា និងយោធា ។
