គណៈរដ្ឋមន្ត្រីបានអនុម័តសេចក្តីព្រាងច្បាប់មួយ ដែលបន្តឹង និងដាក់ពិន័យចំពោះអ្នកជក់បារី និងអ្នកឱ្យកន្លែងជក់បារី ។ សេចក្តីព្រាងច្បាប់អនុក្រឹត្យស្តីពីវិធានការហាមឃាត់ការជក់ នឹងដាក់ពិន័យអ្នកជក់តាមកន្លែងហាមឃាត់ចំនួន ២០.០០០ រៀល… ចំណែកអ្នកផ្តល់កន្លែងជក់តាមភោជនីយដ្ឋាន ឬអ្នកមិនបិទផ្លាកសញ្ញាហាមជក់បារី ឬដាក់ចានគោះបារីក្នុងកន្លែងហាមឃាត់ នឹងត្រូវពិន័យជាប្រាក់ចំនួន ៥០.០០០រៀល ។
សេចក្តីព្រាងអនុក្រិត្យដែលបានអនុម័តដោយគណៈរដ្ឋមន្ត្រី កាលពីព្រឹកថ្ងៃទី០៣ ខែមិនា បានសរសេរថា ច្បាប់នេះ មានគោលបំណងចូលរួមការពារសុខុមាលភាពរបស់ប្រជាពលរដ្ឋ, ការពារនិងទប់ស្កាត់ការរងផ្សែងផលិតផលថ្នាំជក់ ដែលបង្កឲ្យមានហានិភ័យសុខភាពដល់អ្នកនៅជុំវិញ និងបរិស្ថាន និងកាត់បន្ថយការប្រើប្រាស់ផលិតផលថ្នាំជក់ ។
យោងតាមរបាយការណ៍របស់ក្រសួងផែនការឆ្នាំ ២០១៤ បានបង្ហាញថា អ្នកមិនជក់បារី ៦០% បច្ចុប្បន្ន កំពុងស្រូបផ្សែងបារីពីគេ ដែលធ្វើឱ្យប៉ះពាល់សុខភាព ។ របាយការណ៍បានឱ្យដឹងទៀតថា ទីកន្លែងដែលប្រជាពលរដ្ឋកម្ពុជាស្រូបផ្សែងបារីខ្ពស់ជាងគេ គឺនៅភោជនីយដ្ឋាន និងនៅអាហារដ្ឋាន ៧៦% … ក្នុងអគារធ្វើការរបស់រដ្ឋ ៤៩% និងនៅពេលធ្វើដំណើរការតាមមធ្យោបាយធ្វើដំណើរសាធារណៈ ៣៤% ។ សេចក្តីរាយការណ៍បង្ហាញថា បើធៀបទៅនឹងប្រទេសអាស៊ានទាំង១០ ប្រទេសកម្ពុជាមានអត្រាស្រូបផ្សែងបារីខ្ពស់ជាងគេ នៅភោជនីយដ្ឋាន ។