បន្ទាប់ពីបាន ធ្វើដំណើរដល់សាធារណរដ្ឋប្រជាធិបតេយ្យប្រជាមានិតឡាវភ្លាម នាព្រឹកថ្ងៃទី២១ ខែមិថុនា ឆ្នាំ២០១៧នេះ សម្តេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំគណៈប្រតិភូជាន់ខ្ពស់រដ្ឋសភាកម្ពុជា ចូលជួបពិភាក្សាការងារទ្វេភាគីជាមួយ លោកជំទាវ ប៉ានី យ៉ាថទូ (PANY YATHOTUO) ប្រធានរដ្ឋសភាឡាវ នៅមជ្ឈមណ្ឌលសន្និបាតជាតិរបស់ប្រទេសឡាវ។
លោកជំទាវ ប៉ានី យ៉ាថទូ បានទទួលស្វាគមន៍យ៉ាងកក់ក្តៅចំពោះវត្តមានរបស់សម្តេចប្រធានរដ្ឋសភានាឱកាសនេះ។ លោកជំទាវបានគូសបញ្ជាក់ថា នេះជាមហាកិត្តិយសបំផុត ដែលសម្តេចចក្រី បានដឹកនាំគណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា មកបំពេញទស្សនកិច្ចជាផ្លូវការ និងមិត្តភាពនៅក្នុងប្រទេសឡាវ។ ដំណើរទស្សនកិច្ចនេះ នឹងធ្វើឲ្យទំនាក់ទំនង និងកិច្ចសហប្រតិបត្តិការប្រទេសទំាងពីរ ដែលមានជាយូរមកហើយ និង ជាប្រពៃណីនោះ កាន់តែរឹងមាំឡើងថែមទៀត។
សម្តេចប្រធានរដ្ឋសភា បានថ្លែងអំណរគុណដល់លោកជំទាវ និងប្រជាជនឡាវ ដែលបានទទួលស្វាគមន៍ គណៈប្រតិភូរដ្ឋសភាកម្ពុជាយ៉ាងកក់ក្តៅ។ នៅក្នុងឱកាសនោះ តាងនាមគណៈប្រតិភូជាន់ខ្ពស់រដ្ឋសភាកម្ពុជា សម្តេចមានចិត្តរីករាយបំផុត និងសូមអបអរសាទរ និងវាយតម្លៃខ្ពស់ចំពោះ សមិទ្ធផលដ៏ធំធេង ដែលប្រជាជនឡាវសម្រេចបានក្នុងការកសាង និងអភិវឌ្ឍន៍សេដ្ឋកិច្ចសង្គមយ៉ាងឆាប់រហ័ស ហើយជីវភាពរស់នៅរបស់ប្រជាជន ឡាវ កាន់តែប្រសើរឡើងពីមួយថ្ងៃទៅមួយថ្ងៃ។
សម្តេចអគ្គមហាពញាចក្រី ហេង សំរិន បានគូសបញ្ជាក់ថា ក្រោមការដឹកនាំដ៏ឈ្លាសវៃរបស់បក្សប្រជាជនបដិវត្តឡាវ ដែលមាន ឯកឧត្តម ប៊ុនញុំាង វ៉ូរ៉ាជិត អគ្គលេខាធិការបក្ស និងជាប្រធានរដ្ឋ ឯកឧត្តម ថងលួន ស៊ីសូលីដ នាយករដ្ឋមន្ត្រី និងលោកជំទាវផ្ទាល់ ជាប្រធានរដ្ឋសភា សាធារណរដ្ឋប្រជាធិបតេយ្យប្រជាមានិតឡាវ នឹងបន្តសំរេចបាននូវជោគជ័យថ្មីៗថែមទៀត ក្នុងការការពារ និងអភិវឌ្ឍន៍ប្រទេសជាតិ ឆ្ពោះទៅកាន់ភាពសម្បូរណ៍រុងរឿង។ សម្តេចប្រធានរដ្ឋសភា និង លោកជំទាវ ប៉ានី យ៉ាថទូ បានសម្តែងក្តីរីករាយ នៅពេលឃើញចំណងមិត្តភាព និងកិច្ចសហប្រតិការរវាង ប្រទេសកម្ពុជា និងឡាវមានការរីកចម្រើនជាលំដាប់ ទំាងខាងស្ថាប័ននីតិប្បញ្ញត្តិ និងនីតិប្រតិបត្តិ នៅក្នុងនោះថ្នាក់ដឹកនាំប្រទេសទំាងពីរ បានផ្លាស់ប្តូរ ដំណើរទស្សនកិច្ចគ្នាទៅវិញទៅមក។
ជាការកត់សម្គាល់ កាលពីឆ្នាំ២០១៦ លោកជំទាវ ប៉ានី យ៉ាថទូ បានដឹកនាំគណៈប្រតិភូរដ្ឋសភាជាន់ខ្ពស់រដ្ឋសភាឡាវ មកបំពេញទស្សនកិច្ចនៅកម្ពុជា ដែរ។ សម្តេចអគ្គមហាពញាចក្រី បានលើកឡើងថា “យើងខ្ញុំមានសេចក្តីរីករាយ ដែលក្នុងរយៈពេលជាង៤អាណត្តិមកនេះ រដ្ឋសភានៃប្រទេសទាំងពីរ កម្ពុជា-ឡាវ បានធ្វើកិច្ចសហប្រតិបត្តិការជាមួយគ្នាទៅវិញទៅមកបានយ៉ាងល្អប្រសើរ ក្នុងការផ្លាស់ប្តូរបទពិសោធន៍នៅលើការងារនីតិកម្ម ទាំងក្នុងកំរិតថ្នាក់ដឹកនាំស្ថាប័ន គណៈកម្មការជំនាញ និងមន្រ្តីបច្ចេកទេស នៃអគ្គលេខាធិការដ្ឋានរដ្ឋសភា ប្រទេសទាំងពីរ “ ។
សម្តេចប្រធានរដ្ឋសភា បានមានប្រសាសន៍បន្តថា ក្នុងអាណត្តិជាប្រធានរដ្ឋសភា លោកជំទាវ ប៉ានី យ៉ាថទូ មិនត្រឹមតែខិតខំបន្តនូវមរតក នៃកិច្ច សហប្រតិបត្តិការរវាងរដ្ឋសភាប្រទេសទាំងពីរ ដែលមានស្រាប់ប៉ុណ្ណោះទេ តែលោកជំទាវប្រធាន បានខិតខំជំរុញ និងលើកកម្ពស់ឲ្យទំនាក់ទំនង និង កិច្ចសហប្រតិបត្តិការរបស់ស្ថាប័នកំពូលប្រទេសទាំងពីរកាន់តែមានសន្ទុះខ្លាំងក្លាថែមទៀត។
ជាមួយគ្នានេះ សម្តេចអគ្គមហាពញាចក្រី ហេង សំរិន បានស្នើភាគីឡាវថា រដ្ឋសភាប្រទេសទាំងពីរ គប្បីពិចារណារួមគ្នាពិនិត្យ សិក្សា និងធ្វើ បច្ចុប្បន្នភាព ទៅលើកិច្ចព្រមព្រៀង(MOU) ដែលរដ្ឋសភាប្រទេសទំាងពីរបានធ្វើជាច្រើនឆ្នាំហើយនោះឡើងវិញ ក្រែងមានចំណុចខ្វះខាតណាដែលត្រូវបំពេញបន្ថែម។
លោកជំទាវ ប៉ានី យ៉ាថទូ បានគំាទ្រការលើកឡើងរបស់សម្តេចប្រធានរដ្ឋសភា និងបានវាយតម្លៃខ្ពស់ចំពោះស្នាដៃ និងពលីកម្មរបស់ សម្តេច ហេង សំរិន ដែលបានខិតខំជំរុញគំាទ្រទំនាក់ទំនង និងកិច្ចសហប្រតិបត្តិការប្រទេសទំាងពីរកម្ពុជា-ឡាវ នៅគ្រប់កាលៈទេសៈរហូតមក។ លោកជំទាវបាន លើកឡើងថា ការពិនិត្យពិចារណាក្នុងការសិក្សា កែសម្រួលនូវកិច្ចព្រមព្រៀង ដែលរដ្ឋសភាប្រទេសទាំងពីរ បានអនុវត្តកន្លង នៅពេលនេះ មានសារៈ សំខាន់ណាស់ ដើម្បីធ្វើយន្តការកិច្ចសហប្រតិបត្តិការ រវាងរដ្ឋសភាប្រទេសទំាងពីរឲ្យកាន់តែមានប្រសិទ្ធភាព ឆ្លើយតបចំពោះតម្រូវការជាក់ស្តែង។
លោកជំទាវ ប៉ានី យ៉ាថទូ បានជំរុញឲ្យមានការអនុវត្តកិច្ចព្រមព្រៀង រវាងរដ្ឋសភាប្រទេសទំាងពីរបន្ថែមទៀត ក្នុងកម្រិតគណៈកម្មការជំនាញ និង អគ្គលេខាធិការដ្ឋាន។ ជាមួយគ្នានេះ រដ្ឋសភាឡាវបានស្នើដល់រដ្ឋសភាកម្ពុជា ជួយគាំទ្របេក្ខភាពរបស់ខ្លួន ជាអនុប្រធានសភានៃប្រទេសនិយាយ ភាសាបារំាង(APF) និងស្នើសុំ សម្តេចអគ្គមហាពញាចក្រី ហេង សំរិន ចាត់តាំងគណៈប្រតិភូរដ្ឋសភាកម្ពុជា ទទួលបន្ទុកកិច្ចការបរទេសចូលរួមប្រជុំ ដែលរដ្ឋសភាប្រទេសឡាវធ្វើជាម្ចាស់ផ្ទះ នាខែសីហា ខាងមុខនេះ។
សម្តេចអគ្គមហាពញាចក្រី ហេង សំរិន បានទទួលយកសំណើ និងសំណូមពររបស់ភាគីឡាវ។ សម្តេចបានបង្ហាញការគំាទ្ររាល់ការសម្រេចចិត្ត ទំាងឡាយណា នៅក្នុងការពង្រឹងពង្រីកចំណងមិត្តភាព និងកិច្ចសហប្រតិបត្តិការប្រទេសទំាងពីរ ដើម្បីបម្រើផលប្រយោជន៍គ្នាទៅវិញទៅមកនោះ៕
