ភ្នំពេញ: ឯកឧត្តមប៉ា សុជាតិវង្ស អភិបាលរាជធានីភ្នំពេញ បានបញ្ជាក់ថា អាជ្ញាធររាជធានី នឹងធ្វើការកែលំអ រមណីយដ្ឋានទេសចរណ៍កោះដាច់ អោយក្លាយជាតំបន់ទាក់ទាញ និងមានបរិស្ថានល្អ ស្របពេលដែលសង្កាត់កោះដាច់ ត្រូវបានរាជរដ្ឋាភិបាល សម្រេចកាត់បញ្ចូល មកអោយរាជធានីភ្នំពេញ នាប៉ុន្មានឆ្នាំចុងក្រោយនេះ។
ការបញ្ជាក់ពីគម្រោងបែបនេះ ត្រូវបាន ឯកឧត្តម ប៉ា សុជាតិវង្ស បង្ហាញអោយដឹង ខណៈដែលលោក និងមន្ត្រីរដ្ឋបាលរាជធានី ចុះពិនិត្យមើលជាក់ស្តែង នៅលើទីតាំងរមណីដ្ឋាន ទេសចរណ៍កោះដាច់ កាលពីព្រឹកថ្ងៃទី១ ឧសភា ពោលគឺក្រោយពីបញ្ចប់ ពិធីបើកសម្ពោធដាក់ អោយប្រើប្រាស់ អគាររដ្ឋបាលសង្កាត់ និងប៉ុស្តិ៍រដ្ឋបាលសង្កាត់កោះដាច់ ។
ឯកឧត្តម ប៉ា សុជាតិវង្ស បានមានប្រសាសន៍ថា រមណីយដ្ឋាន ទេសចរណ៍កោះដាច់ ពិតជាអំណោយផលល្អណាស់ សម្រាប់បងប្អូនប្រជាពលរដ្ឋ មកទេសចរណ៍ ដើរលេងកំសាន្ត នៅរមណីដ្ឋាននេះ ។ ដូច្នេះរមណីយដ្ឋាន ទេសចរណ៍កោះដាច់ ត្រូវតែមានការកែសម្រួល សោភ័ណភាព អោយកាន់តែប្រសើរឡើង ដោយត្រូវរៀបចំទុកដាក់ សម្រាមអោយបានល្អ ហើយការរៀបចំគ្រែអង្គុយ ខ្យូស ក៏ត្រូវតែរៀបចំកែសម្រួល អោយបានស្អាត ដើម្បីទាក់ទាញភ្ញៀវទេសចរ អោយកាន់តែកើនឡើង ស្របពេលដែល តំបន់ទេសចរណ៍មួយនេះ កំពុងតែទាក់ទាញភ្ញៀវទេសចរនោះ។
ជាគម្រោង បើតាមការបង្ហើបពី ឯកឧត្តម ប៉ា សុជាតិ ថា អាចនឹងធ្វើជាផ្ទះសំណាក់ ដែលសាងសង់ពីកុងតឺន័រ បំពាក់ដោយម៉ាស៊ីនត្រជាក់នៅក្នុងរមណីយដ្ឋាននេះថែមទៀត។
លោក ឃ្លាំង ហួត អភិបាលខណ្ឌជ្រោយចង្វា បានបញ្ជាក់អោយដឹងថា តំបន់ទេសចរណ៍កោះដាច់ ក្នុងឱកាសបុណ្យចូលឆ្នាំថ្មីនេះ ទទួលបានភ្ញៀវទេសចរ ប្រមាណជាង ១៥.០០០ នាក់៕
