ភ្នំពេញ ៖ កម្មករ-កម្មការិនី បម្រើការងារក្នុងវិស័យឧស្សាហកម្មកាត់ដេរ នៅជាយរាជធានីភ្នំពេញ បានថ្លែងនូវការសាទរ និងដឹងគុណជានិច្ច ចំពោះរាជរដ្ឋាភិបាលកម្ពុជា ដែលបានគិតគូរដល់ការបន្ថយថ្លៃលក់អគ្គិសនី ក្នុងការចូលរួមកាត់បន្ថយនូវភាពក្រីក្រពិតប្រាកដ ដើម្បីឲ្យកម្មករ-កម្មការិនី ក៏ដូចប្រជាពលរដ្ឋទូទៅ កាន់តែមានលទ្ធភាព ក្នុងជីវភាពរស់នៅប្រចាំថ្ងៃរបស់ពួកគាត់។
តំណាងក្រុមកម្មករ-កម្មការិនី ដែលកំពុងបម្រើការងារក្នុងវិស័យឧស្សាហកម្មកាត់ដេរ បានជួលបន្ទប់ស្នាក់នៅក្នុង និងជាយរាជធានីភ្នំពេញ បានថ្លែងនៅថ្ងៃទី០១ មេសា ឆ្នាំ២០១៧ នេះថា ពាក់ព័ន្ធនឹងវិស័យអគ្គិសនី ពួគគាត់ទទួលការចុះតបណ្តាញ និងដំឡើងកុងទ័រអគ្គិសនីម្តងរួចមកហើយពីអគ្គិសនីកម្ពុជា ដែលជាការជំរុញឲ្យពួកគាត់កាន់តែមានលទ្ធភាព ក្នុងការប្រើប្រាស់អគ្គិសនីដោយខ្លួនឯង ជាពិសេសការកាត់បន្ថយចំណាយបានមួយផ្នែកធំ លើការប្រើប្រាស់អគ្គិសនីនេះតែម្ដង។
ពាក់ព័ន្ធនឹងការបន្ថយថ្លៃលក់អគ្គិសនី របស់រាជរដ្ឋាភិបាលកម្ពុជា ដែលបានចេញតាមសេចក្តីជូនដំណឹង ស្តីអំពី ការបន្ថយថ្លៃលក់អគ្គិសនី នៅក្នុងតំបន់ចែកចាយអគ្គិសនីកម្ពុជា ដែលនឹងអនុវត្តន៍ចាប់ពីថ្ងៃទី១ ខែមេសា ឆ្នាំ២០១៧ តំណាងកម្មករ-កម្មការិនី ដែលបម្រើការងារនៅរោងចក្រហូរគារ ស្ថិតក្នុងសង្កាត់ចាក់អង្រែលើ ចាក់អង្រែក្រោម និងកម្មករ-កម្មការិនី នៅរោងចក្រ ហុង វ៉ា បានសម្តែងនូវការសប្បាយចិត្តយ៉ាងខ្លាំង ។
កម្មករ កម្មការិនី ក៏បានថ្លែងនូវការដឹងគុណជានិច្ច ចំពោះ រាជរដ្ឋាភិបាល ក្រោមការដឹកនាំដ៏ឈ្លាសវៃ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តែងតែគិតគូរខ្ពស់ ចំពោះជីវភាពប្រចាំថ្ងៃរបស់ប្រជាពលរដ្ឋ ជាពិសេសដល់កម្មករ-កម្មការិនី ដែលកំពុងរស់នៅបន្ទប់ជួល ឲ្យមានលទ្ធភាពកាន់តែច្រើន នៅក្នុងជីវភាពរស់នៅប្រចាំថ្ងៃ ដែលពួកគាត់ចាត់ទុកថា ជាការទទួលបានអត្ថប្រយោជន៍ជាបន្តបន្ទាប់ពីរាជរដ្ឋាភិបាល។
លោក តេង សុខុមាល នាយកបញ្ជីផ្នែកលក់អគ្គិសនី នៃអាជ្ញាធរអគ្គិសនីកម្ពុជា បានឲ្យដឹងថា នៅក្នុងការបញ្ចុះថ្លៃលក់អគ្គិសនីនេះ អាជ្ញាធរអគ្គិសនីកម្ពុជា បានរៀបចំពីនីតិវិធីរួចជាស្រេច ដើម្បីចាប់អនុវត្តន៍ពីថ្ងៃទី១ ខែមេសា ឆ្នាំ២០១៧ ស្អែកនេះតទៅ ក្នុងនោះសម្រាប់សេវាករដែលបានតអគ្គិសនីចេញពីបណ្តាញជាតិ យកទៅផ្គត់ផ្គង់អគ្គិសនីជូនអតិថិជនរបស់ខ្លួន ក៏តម្រូវឲ្យកំណត់ថ្លៃលក់អគ្គិសនីថ្មីនេះផងដែរ លើកលែងតែសេវាករ ដែលធ្វើការផ្គត់ផ្គង់ដោយម៉ាស៊ីន និងសេវាករដែលទាញយកប្រភពអគ្គិសនីមកពីប្រទេសជិតខាង។
បើយោងតាមប្រសាសន៍របស់អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅក្នុងពិធីប្រគល់សញ្ញាប័ត្រដល់គរុនិស្សិតសិស្ស នៅវិទ្យាស្ថានជាតិអប់រំ កាលពីពេលថ្មីៗនេះ បានលើកឡើងថា ចាប់ពីថ្ងៃទី០១ ខែមេសា ឆ្នាំ២០១៧នេះតទៅ ប្រជាពលរដ្ឋនឹងទទួលបានអត្ថប្រយោជន៍សំខាន់ៗជាច្រើន ពាក់ព័ន្ធនឹងវិស័យអគ្គិសនី ក្នុងនោះសម្រាប់អ្នកប្រើប្រាស់អគ្គិសនីក្រោម១០គីឡូវ៉ាត់ម៉ោងក្នុងមួយខែ នឹងចុះថ្លៃមកនៅត្រឹម៤៨០រៀល ក្នុងមួយគីឡូវ៉ាត់ម៉ោង ប្រើប្រាស់ក្រោម៥០គីឡូវ៉ាត់ម៉ោងក្នុងមួយខែ ធ្លាក់ថ្លៃមកនៅ៦១០រៀល ក្នុងមួយគីឡូវ៉ាត់ម៉ោង ចំណែកអ្នកប្រើប្រាស់ភ្លើងលើសពី៥០គីឡូវ៉ាត់ម៉ោង ក្នុងមួយខែវិញ នៅត្រឹម៧៧០រៀល ក្នុងមួយគីឡូវ៉ាត់ម៉ោង ៕