កម្ពុជា និងទួគី កំពុងជម្រុញសម្រេចគោលដៅ ផ្លាស់ប្ដូរទំហំពាណិជ្ជកម្មរវាងប្រទេសទាំង២ ចំនួន ៥០០លានដុល្លារ ក្នុងឆ្នាំ ២០២០ ប្រមាណ ៤ឆ្នាំខាងមុខទៀត ។
ការជម្រុញនេះធ្វើឡើងក្នុងជំនួប រវាងឯកឧត្តមឧបនាយករដ្ឋមន្ដ្រី ហោ ណាំហុង រដ្ឋមន្ដ្រីការបរទេស និងសហប្រតិបត្តិការអន្ដរជាតិ ដែលបានអនុញ្ញាតឲ្យលោកជំទាវ អាយសេ ស៊ីនៀលលីអូគ្លូ (AYSE Sinnirlioglu) ទីប្រឹក្សា ជាន់ខ្ពស់ផ្នែកទំនាក់ទំនងអន្ដរជាតិរបស់ប្រធានាធិបតីទួគី (Sherpa) ចូលជួបសម្ដែងការគួរសម និងពិភាក្សាការងារនៅថ្ងៃទី២១ ខែមករា ឆ្នាំ ២០១៦ នៅទីស្ដីការក្រសួង ។
លោកជំទាវ អាយសេ ស៊ីនៀលលីអូគ្លូ បានជំរាបជូន ឯកឧត្តមឧបនាយករដ្ឋមន្ដ្រីពីសំណើរបស់ប្រធានាធិបតីទួគី សូមអញ្ជើញតំណាងជាន់ខ្ពស់របស់កម្ពុជា ចូលរួម ៉កិច្ចប្រជុំកំពូលមនុស្សធម៌ពិភពលោកឆ្នាំ ២០១៦ ៉ (World Humanitan Summit 2016) នៅទីក្រុងអ៊ីស្ដង់ប៊ូល (Istanbul) ថ្ងៃទី២៣-២៤ ឧសភា ឆ្នាំ ២០១៦ និងកិច្ចប្រជុំ «ការពិនិត្យឡើងវិញក្នុងពាក់កណ្ដាលអាណត្តិ នូវផែនការសកម្មភាពទីក្រុងអ៊ីស្ដង់ប៊ូល »(Midterm Review of Istanbul Program of Action) នៅទីក្រុងអន់តាល់យ៉ា Antalya ប្រទេសទួគី ថ្ងៃទី២៧-២៩ ខែឧសភា ឆ្នាំ ២០១៦ ដើម្បីពិនិត្យការវាយតំលៃការអនុវត្តន៍ផែនការសកម្មភាពទីក្រុងអ៊ីស្តង់ប៊ូល របស់ប្រទេសមានការអភិវឌ្ឍន៍តិច និងដៃគូអភិវឌ្ឍ។ ឯកឧត្តមឧបនាយករដ្ឋមន្ដ្រី និងលោកជំទាវ អាយសេ ស៊ីនៀលលីអូគ្លូ បានពិភាក្សាផ្លាស់ប្ដូរយោបល់គ្នា អំពីការជំរុញបន្ថែមទៀត នូវកិច្ចសហប្រតិបត្តិការទ្វេរភាគី ពិសេសលើផ្នែកសេដ្ឋកិច្ច ។
ឯកឧត្តមឧបនាយករដ្ឋមន្ដ្រី និងលោកជំទាវ បានវាយតម្លៃខ្ពស់ចំពោះការរីកចំរើនក្នុងទំនាក់ទំនងទ្វេភាគីរវាងប្រទេសទាំងពីរ ដូចជាការបង្កើតក្រុមប្រឹក្សាធុរៈកិច្ច និងគណៈកម្មការចំរុះសហប្រតិបត្តិការសេដ្ឋកិច្ច សំរាប់ជំរុញអនុវត្តឲ្យបានសម្រេចនូវគោលដៅផ្លាស់ប្ដូរពាណិជ្ជកម្មទំហំ ៥០០លានដុល្លារ ក្នុងឆ្នាំ២០២០ ។ ដោយឡែក ក៏មានឯកសារមួយចំនួនទៀតដែលប្រទេសទាំង២ បានចុះហត្ថលេខារួចហើយដូចជា កិច្ចព្រមព្រៀងសេវាកម្មអាកាសចរណ៍ កិច្ចព្រមព្រៀងស្ដីពីការជំរុញ និងការការពារវិនិយោគទុន និងកិច្ចព្រមព្រៀងស្ដីពីវិស័យទេសចរណ៍ ហើយនិងការត្រៀមចុះហត្ថលេខាលើអនុស្សារណៈ ស្ដីពីកិច្ចសហប្រតិបត្តិការការទូត កិច្ចព្រមព្រៀងស្ដីពីសហប្រតិបត្តិការវប្បធម៌ ។
ឯកឧត្តមឧបនាយករដ្ឋមន្ដ្រី និងលោកជំទាវបានពិភាក្សាផ្លាស់ប្ដូរយោបល់គ្នា លើការជំរុញការអនុវត្តន៍ឯកសារ ដែរបានចុះហត្ថលេខាខាងលើនេះ ជាអាទិ៍ការផ្លាស់ប្ដូរទស្សនកិច្ចទៅវិញទៅមករបស់សភាពាណិជ្ជកម្ម (Chamber os Commerce) និងធុរកិច្ចជន ការបង្កើតឲ្យមានជើងហោះហើរត្រង់ និងការរៀបចំការតាំងបង្ហាញផ្នែកទេសចរណ៍របស់កម្ពុជានៅទូគី សំដៅជំរុញទេសចរណ៍ ទួគីឲ្យមកបំពេញទស្សនកិច្ចនៅកម្ពុជា ។
ឯកឧត្តមឧបនាយរដ្ឋមន្ដ្រី បានស្នើឲ្យទួគីពិនិត្យលទ្ធភាពក្នុងការនាំចូលអង្ករពីកម្ពុជាដែលទទួលបានចំណាត់ថ្នាក់ជាអង្ករលេខ១ នៅលើពិភពលោក ក្នុងរយៈពេល ៤ឆ្នាំ ជាបន្ដបន្ទាប់ពីឆ្នាំ ២០១២-២០១៥។ ឯកឧត្តមក៏បានថ្លែងអំណរគុណចំពោះរដ្ឋាភិបាលទួគី ដែលបានផ្ដល់អាហារូបករណ៍ សំរាប់ការបណ្ដុះបណ្ដាលអ្នកការទូតវ័យក្មេងរបស់កម្ពុជាចំនួន ៩នាក់ ។
ឯកឧត្តមឧបនាយករដ្ឋមន្ដ្រី និងលោកជំទាវ ក៏បានពិភាក្សាផ្លាស់ប្ដូរយោល់គ្នាផងដែរ អំពីកិច្ចសហប្រតិបត្តិការរវាងប្រទេសទាំង២ លើវេទិការអន្ដរជាតិ និងការរៀបចំឲ្យមានកិច្ចប្រជុំពិគ្រោះយោបល់រវាងប្រទេសទាំង២ ។ នៅក្នុងកិច្ចសន្ទនា លោកជំទាវបានសំដែរការកោតសរសើរ ចំពោះការរីកចំរើនផ្នែកសេដ្ឋកិច្ចនៅកម្ពុជាផងដែរ ។