ក្រសួងសាធារណការ និងដឹកជញ្ជូនបានចេញសេចក្តីជូនដំណឹងមួយព្រមានថា ក្រសួងនឹងចាត់វិធានការតឹងរឹង ចំពោះបុគ្គលណាដែលសាងសង់សំណង់ លុបប្រឡាយ ស្រះ គន្លងបង្ហូរទឹក សម្រូលសុវត្ថិភាពផ្លូវថ្នល់ និងធ្វើកិច្ចសាធារណៈឬឯកជន នៅក្នុងដីចំណីផ្លូវជាតិលេខ៤ ដោយគ្មានការអនុញ្ញាត ពីសមត្ថកិច្ចគ្រប់គ្រងផ្លូវថ្នល់ ។
សេចក្តីព្រមាននេះ បានធ្វើឡើងបន្ទាប់ពីមានហេតុការណ៍គន់ខ្លះ បានកើតឡើងក្រោយក្រុមហ៊ុន អេហ្សិតរបស់ លោកឧកញា អ៊ឹង ប៊ុនហូវ បានបញ្ចប់កុងត្រាជាមួយនឹងរាជរដ្ឋាភិបាល ហើយបានដកចេញពីការដ្ឋានសំណង់ផ្លូវជាតិលេខ៤ ដោយបន្សល់ទុកកន្លែងមិនទាន់សាងសង់ហើយ និងកន្លែងបង្ហូកមួយចំនួនដែលមិនទាន់ធ្វើបង្ហើយ ។
សេចក្តីរាយការណ៍បានអោយដឹងថា ប្រជាជនខ្លះ បានធ្វើការលុបប្រឡាយ និងកែសំណង់តាមផ្លូវមួយចំនួន ដែលបណ្តាលអោយខុសនឹងគម្រោងសាងសង់ ។ សេចក្តីជូនដំណឹងបាននិយាយថា មួយរយៈពេលចុងក្រោយនេះ ក្រសួងសង្កេតឃើញថា មានការកើនឡើងនូវបាតុភាពរំលោភបំពានច្បាប់ ពីបុគ្គលមួយចំនួន ដូចជាការសាងសង់សំណង់ ការលប់ប្រលាយ ស្រះ គន្លងបង្ហូរទឹក សម្រូលសុវត្ថិភាពផ្លូវថ្នល់ ការលក់ដូរ និងការចតយានយន្ត គ្មានសណ្តាប់ធ្នាប់លើដីចំណីផ្លូវ ដែលជាទ្រព្យសម្បត្តិសាធារណៈរបស់រដ្ឋ នៅតាមបណ្តាយផ្លូវជាតិលេខ៤ ។
លិខិតបានស្នើឲ្យសាធារណជន ដែលជាម្ចាស់លំនៅស្ថាន ឬម្ចាស់កម្មសិទ្ធិ អចលនទ្រព្យ និងចលនទ្រព្យ និងអ្នកប្រើប្រាស់ទាំងអស់ ចូលរួមសហការអនុវត្តច្បាប់ក្នុងការគ្រប់គ្រង និងការការពារដីចំណីផ្លូវ សំណង់ និងការថែរក្សាសណ្តាប់ធ្នាប់សាធារណៈ នៅតាមបណ្តោយផ្លូវលេខ៤នេះ ឲ្យមានប្រសិទ្ធភាព និងនិរន្តភាពប្រកបដោយស្មារតីទទួលខុសត្រូវខ្ពស់ ។