សម្ដេចហ៊ុនសែននាយករដ្ឋមន្រ្តីនៃកម្ពុជាបានបន្តស្នើឱ្យប្រជាពលរដ្ឋអនុវត្តន៍តាមការណែនាំរបស់ក្រសួងសុខាភិបាលឱ្យបានត្រឹមត្រូវ ដើម្បីចូលរួមប្រយុទ្ធប្រឆាំងជំងឺឆ្លងកូវីដ-១៩ ទាំងអស់គ្នា។នៅលើបណ្ដាញទំនាក់ទំនងសង្គមផ្លូវការ នាថ្ងៃទី២៩ ខែមីនា ឆ្នាំ២០២០ សម្ដេចហ៊ុន សែន បានសរសេរថា កម្ពុជាចូលរួមប្រយុទ្ធប្រឆាំងជំងឺឆ្លងកូវីដ-១៩ ទាំងអស់គ្នា ហើយសូមបងប្អូនអនុវត្តន៍តាមការណែនាំរបស់ក្រសួងសុខាភិបាលឱ្យបានត្រឹមត្រូវ។
សម្ដេចបានលើកឡើងថា គ្រប់គ្នាត្រូវចងចាំថា ជំងឺកូវីដ-១៩ គឺជាជំងឺឆ្លង ដ៏កាចសហាវដែលយើងមិនអាចមើលឃើញនឹងភ្នែកឡើយ។ ប៉ុន្តែវិធីងាយៗមួយចំនួន អាចជួយទប់ស្កាត់ការឆ្លងរាលដាលជំងឺនេះបាន។ សម្ដេចបានបន្ដថា សូមទម្លាប់យកជាប់ជាមួយខ្លួន ដោយដាក់តាមហោប៉ៅ ឬដាក់កាបូបការងារ និងតាមរថយន្ត នូវដបទឹកថ្នាំជែលសម្លាប់មេរោគបាក់តេរី (Hand Sanitizer) ឬដបទឹកអាល់កុល ម៉ាស ឬក្រមា ជាប់តាមខ្លួន ឬជាប់ក្នុងរថយន្ត។
សម្ដេចក៏បានណែនាំដល់បងប្អូនប្រជាពលរដ្ឋ សូមឧស្សាហ៍ដុសលាងសម្អាតដៃជាប្រចាំជាមួយសាប៊ូ ឬទឹកថ្នាំជែលសម្លាប់មេរោគ មុន និងក្រោយ កាន់ ឬស្ទាប ប៉ះពាល់វត្ថុអ្វីមួយនៅខាងក្រៅ ដែលយើងមិនអាចមើលឃើញផ្ទាល់នឹងភ្នែកថាតើវត្ថុទាំងនោះមានមេរោគឬអត់។ ទន្ទឹមនេះ សូមកុំយកដៃទទេដែលមិនបានសម្អាតជាមុន មកប៉ះភ្នែក ច្រមុះ ឬមាត់។ ជាមួយគ្នានេះ ត្រូវពាក់ម៉ាសឬប្រើក្រមា បើគ្មានម៉ាសដើម្បីទប់ស្កាត់ការឆ្លងមេរោគពីគេមកយើង នឹងពីយើងទៅគេ។
សម្ដេចបញ្ជាក់ថា សំខាន់ណាស់ បើបងប្អូនប្រជាពលរដ្ឋ ជាពិសេសពលករ ពលការិនី ដែលទើបវិលមកពីក្រៅប្រទេស ត្រូវដាក់ខ្លួនឯងឱ្យនៅដាច់ដោយឡែក ១៤ ថ្ងៃ កុំទៅជិតឪពុកម្តាយ ប្រពន្ធ ឬ ប្តី ឬកូន ហើយត្រូវរង់ចាំទទួលលទ្ធផលពីការធ្វើតេស្តជាមុនសិនថា តើមានរោគឆ្លងឬអត់មានរោគឆ្លងទើបអាចនៅជិតគ្នាបាន។
សម្ដេចហ៊ុន សែន ក៏បានស្នើឱ្យក្រុមការងារគណបក្សប្រជាជនកម្ពុជា រាប់ទាំងសមាជិកព្រឹទ្ធសភា សមាជិករដ្ឋសភា និងមន្រ្តីនៃសមាជិករាជរដ្ឋាភិបាល អាជ្ញាធរ និងសមត្ថកិច្ចពាក់ព័ន្ធទាំងអស់ បន្តចុះជួយអប់រំផ្សព្វផ្សាយវិធីបង្ការទប់ស្កាត់ជំងឺកូវីដ-១៩ ជាប្រចាំនៅតាមមូលដ្ឋានដោយនាំទៅជាមួយនូវ ម៉ាស ឬក្រមា អង្ករ មី ត្រីខ ចែកជូនប្រជាពលរដ្ឋក្រីក្រនៅមូលដ្ឋានផងដែរ។ សម្ដេចបានថ្លែងថា កុំចាំហៅពួកគាត់ឱ្យមកចូលរួមប្រជុំ តែសូមទៅកាន់ទីកន្លែងដែលពួកគាត់រស់នៅតែម្តង ជាពិសេសក្នុងស្ថានភាពដែលយើងទាំងអស់គ្នាកំពុងប្រយុទ្ធប្រឆាំងនឹងជំងឺឆ្លងកូវីដ-១៩។
សម្ដេចបានបញ្ជាក់ទៀតថា ដើម្បីសុវត្ថិភាពសុខភាពផ្ទាល់ខ្លួន និងសម្រាប់គ្រួសារ សូមបងប្អូនប្រជាពលរដ្ឋសហការជាមួយមន្ទីរសុខាភិបាល។ ក្នុងករណីមានការសង្ស័យ ហើយត្រូវការពិភាក្សា ឬប្រឹក្សាយោបល់ សូមទូរសព្ទមកលេខ ១១៥ ជាបន្ទាន់។សូមជម្រាបជូនថាគិតត្រឹមថ្ងៃទី២៩ ខែមីនា ឆ្នាំ២០២០នេះ ចំនួនអ្នកឆ្លងវីរុសកូវីដ-១៩ នៅកម្ពុជា មានចំនួន១០៣នាក់ ក្នុងនោះអ្នកជាសះស្បើយ មានសរុបចំនួន២១នាក់ហើយ៕