ភ្នំពេញ ៖ ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា គ្មានឯកសារណាច្បាស់ និងពិតប្រាកដជាងឯកសារដែលជនជាប់ចោទទទួល ស្គាល់នោះទេ បញ្ហាសំខាន់ គឺសាមីជនជាជនជាប់ចោទទទួលស្គាល់។
ឯកឧត្តម សុខ ឥសាន ថ្លែងបែបនេះ តាមរយៈសារអេឡិចត្រូនិចតេឡេក្រាមរបស់ខ្លួន នារសៀលថ្ងៃទី១៧ ខែមករា ឆ្នាំ ២០២០ និងបន្ទាប់ពីលោក កឹម សុខា បានទទួលស្គាល់សំឡេង និងរូបភាពនៅក្នុងវីដេអូ ដែលត្រូវបានបង្ហាញនៅក្នុងសវនាការរបស់សាលាដំបូងរាជធានីភ្នំពេញ កាលពីថ្ងៃទី១៥ ខែមករា ។
អ្នកនាំពាក្យគណបក្សប្រជាជនកម្ពុជារូបនោះបានថ្លែងយ៉ាងនេះថា “គ្មានឯកសារណាច្បាស់ និងពិតប្រាកដជាងឯកសារដែលជនជាប់ចោទទទួលស្គាល់ទាំងរូបភាព និងសម្លេងសាមីជនទេ បញ្ហាសំខាន់ គឺសាមីជនជនជាប់ ចោទទទួលស្គាល់។ ថាជនជាប់ចោទអត់បានប្រព្រឹត្តម៉េចកើត បើជនជាប់ចោទទទួលស្គាល់ថា ជារូបភាព និងសម្លេងរបស់ខ្លួនពិតប្រាកដមែនហើយ”។
ឯកឧត្តម សុខ ឥសាន លើកឡើងទៀតថា ក្នុងការជំនុំជំរះក្តី គេយកភស្តុតាង ឯកសារ និងសាក្សី គេមិនយកតាមការយល់ឃើញរបស់ជនណាម្នាក់ ឬក្រុមជនណាមួយឡើយ។ លោកបន្តថា ការដែលជនជាប់ចោទចង់ឲ្យចាក់វីដេអូពិស្ដារនោះ គឺជាការល្អ ហើយបើចាក់ឯកសារវែងកាន់តែធ្ងន់ធ្ងរថែមទៀត។ លោកបញ្ជាក់យ៉ាងនេះថា “ចង់បានការចាក់ផ្សាយឯកសារវែងទាំងស្រុង ជាការល្អចង់បង្ហាញការពិត បើយកឯសារខ្លីកាត់តមិនគ្រប់គ្រាន់ទេ មានតែយកពីខ្លឹមសារដើម។ បើចង់យកឯកសារពិស្តារមកសំអាងតិចថាកាន់តែធ្ងន់កថែម”។
សូមបញ្ជាក់ថា សវនាការលើសំណុំរឿងក្តី “សន្ទិដ្ឋិភាពជាមួយបរទេស” របស់លោកកឹម សុខា កាលពីថ្ងៃទី១៥ ខែមករា ឆ្នាំ២០២០ លោក កឹម សុខា បានប្រកាសទទួលស្គាល់រូបភាព និងសំឡេង នៅក្នុងខ្សែវីដេអូ ដែលជាឯកសារភស្តុតាង ដើម្បីធ្វើការចោទប្រកាន់លើលោក កឹម សុខា ប៉ុន្តែលោកបានបដិសេធ ដោយសារតែខ្សែវីដេអូនោះខ្លីពេក ហើយចង់ឲ្យចាក់ខ្សែវីដេអូពេញទាំងមូល៕