សម្តេចតេជោនាយករដ្ឋមន្ត្រី ហ៊ុន សែន បានមានប្រសាសន៍ហៅសកម្មភាពប្រឆាំង របស់អង្គការ Global witness ថាជាការប្រឆាំងដ៏ឆ្គួតលេលា។ យោងតាមទីភ្នាក់ងារ Fresh news ប្រសាសន៍របស់សម្តេចតេជោសែន តបចំពោះ Global witness នេះបានសរសេរផ្ញើពីទីក្រុងដាវ៉ូស នៃប្រទេសស្វីស ដែលសម្តេចកំពុងចូលរួមវេទិកាសេដ្ឋកិច្ចពិភពលោក។
សម្តេចតេជោនាយករដ្ឋមន្ត្រី បានសរសេរដាស់តឿនអង្គការ Global witness និងបក្សពួកថា ”ល្មមឈប់ល្ងង់ និងឆ្គួតទៀតទៅ” ។ ប្រសាសន៍របស់សម្តេច បានធ្វើឡើងបន្ទាប់ពីអង្គការ Global witness បានចេញសេចក្តីថ្លែងការណ៍មួយកាលពីថ្ងៃទី១៨ ខែមករា នៅក្នុងក្រុងដាវ៉ូសនៃប្រទេសស្វីស បានអំពាវនាវជាអន្តរជាតិរកការរារាំង សម្តេចតេជោ ហ៊ុន សែន មិនអោយចូលរួមក្នុងវេទិកាសេដ្ឋកិច្ចពិភពលោកនោះឡើយ។ អង្គការ Global witness ថែមទាំងបានសរសេរញុះញុង់ រកអ្នកចូលរួមនៅទីនោះ ប្រឆាំងរដ្ឋាភិបាលកម្ពុជា មិនអោយផ្សាយវីដេអូ “ផ្កាយកំពុងរះរបស់អាស៊ាន” ដែលជាកម្មវិធីទាក់ទាញទេសចរណ៍ និងការវិនិយោគបរទេស ទៅកាន់កម្ពុជានោះថែមទៀត។
ប៉ុន្តែសេចក្តីថ្លែងការណ៍ញុះញុង់របស់ Global witness នោះមិនមានការគាំទ្រណាមួយពីសមាជិកជាង ៣០ប្រទេស ដែលបានចូលរួមជាសកលនោះឡើយ។ សម្តេចតេជោ សែន បានសរសេរប្រាប់ Global witness វិញថា សូមកុំប្រឆាំងឆ្គួតលេលា។ នាយករដ្ឋមន្ត្រីគេធ្វើការជាមួយគ្នាបែបនេះ គឺជាទម្លាប់ធម្មតានៃទំនាក់ទំនងរវាងរដ្ឋនិងរដ្ឋ។ សម្តេចបានដាស់តឿន Global witness ទៀតថា បើខួរក្បាលមិនទាន់ឡប់ឬឆ្គួតទេ គួរចូលសាលារៀនថែមទៀតទៅ ។
Global witness គឺជាអង្គការអន្តរជាតិមួយ ដែលបង្កើតឡើងក្នុងឆ្នាំ១៩៩៣ ដែលមានទីតាំងក្នុងក្រុងឡុងដ្រ៍ នៃប្រទេសអង់គ្លេស និងស្ថិតក្នុងក្រុង Washington សហរដ្ឋអាមេរិកផងដែរ។ របាយការណ៍របស់អង្គការនេះ ចំពោះកម្ពុជាបានរងនឹងការរិះគន់ជាខ្លាំងពីរាជរដ្ឋាភិបាល ដែលចោទថា មាន ទំនោរលំអៀង និងខុសពីតួលេខនៃការពិតជាក់ស្តែង។