ក្រសួងមហាផ្ទៃបានអោយដឹងថា ចាប់ពីពាក់កណ្តាលខែមីនា ឆ្នាំ ២០១៦ នោះទៅ មន្រ្តីនគរបាលចរាចរណ៍ផ្លូវគោក នឹងចាប់ផ្តើមធ្វើការត្រួតពិនិត្យរាល់បទល្មើសទាំងអស់ ដែលមានចែងក្នុងច្បាប់ចរាចរណ៍ផ្លូវគោក និងលិខិតស្នាមមួយចំនួនផងដែរ ។
គួររំលឹកថា ច្បាប់ចរាចរណ៍ផ្លូវគោកថ្មី ដែលបានចេញកាលពីថ្ងៃទី១ ខែមករា ឆ្នាំ ២០១៦ កន្លងទៅ ត្រូវគេឃើញថានៅមិនទាន់បានអនុវត្តពេញលេញនៅឡើយទេ ដោយសារមានសំណូមពរពីប្រជាពលរដ្ឋខ្លះ ឲ្យកែប្រែនូវចំណុចមួយចំនួនទាក់ទងនឹងបច្ចេកទេសយានយន្ត… តម្លៃប័ណ្ណបើកបរនៃយានយន្តខ្លះ ។ល។ ដែលសំណើទាំងឡាយនោះ បាននាំអោយការអនុវត្តច្បាប់ មិនទាន់បានធ្វើដោយគ្រប់លក្ខណៈ ១០០ភាគរយ នោះទេ ។
យោងតាមសេចក្តីជូនដំណឹង របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ចុះហត្ថលេខាថ្ងៃទី១៩ ខែមករា ឆ្នាំ ២០១៦ ដោយ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សាធារណជនណាដែលមិនទាន់បានបំពេញលក្ខខណ្ឌបែបបទយានយន្ត ត្រូវប្រញាប់ទៅបំពេញអោយហើយ ជាពិសេសការចុះបញ្ជីយានយន្តដែលមិនទាន់មានផ្លាកលេខ ការប្រឡងយកបណ្ណបើកបរយាន្តយន្ត ការត្រួតពិនិត្យលក្ខណ:បច្ចេកទេសយានយាន្ត និងការធ្វើលិខិតអនុញ្ញាតធ្វើអាជីវកម្មដឹកជញ្ជូន ។
សេចក្តីជូនដំណឹងដដែល បានបញ្ជាក់ថាចាប់ពីថ្ងៃទី១៥ មីនា ឆ្នាំ ២០១៦ តទៅ មន្ត្រីនគរបាលចរាចរណ៍ផ្លូវគោក នឹងចាប់ផ្តើមធ្វើការត្រួតពិនិត្យរាល់បទល្មើសទាំងអស់ ដែលមានចែងក្នុងច្បាប់ចរាចរណ៍ផ្លូវគោក ក្នុងនោះ រួមមានទាំងការត្រួតពិនិត្យលិខិតស្នាមប័ណ្ណយានយន្តផងដែរ ។