គណៈកម្មការជាតិដើម្បីទប់ស្កាត់ និងបង្ក្រាបបទល្មើសព្រៃឈើ បានចុះធ្វើសកម្មភាពបង្ក្រាបអំពើអនាធិបតេយ្យព្រៃឈើ តាមខេត្តដែលជាប់នឹងព្រំដែនវៀតណាម និងបានរឹបអូសឈើប្រណិតជាច្រើន ។
គណៈកម្មការជាតិ ដែលរួមមានសមាសភាពចម្រុះពីមន្ត្រីជាន់ខ្ពស់នគរបាលជាតិ… មន្ត្រីក្រសួងបរិស្ថាន…ក្រសួងកសិកម្ម និងអភិបាលខេត្តចំនួន ៦ទៀត ដែលជាប់ព្រំដែនវៀតណាម បានបង្កើតកាលពីថ្ងៃទី១៥ មករាដោយមានប្រធានដឹកនាំគឺ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ។
យោងតាមកិច្ចប្រជុំរបស់គណៈកម្មការជាតិ នៅព្រឹកមិញនេះ ខេត្តត្បូងឃ្មុំ ខេត្តក្រចេះ និងខេត្តមណ្ឌលគីរី គឺជាខេត្តនៃមុខសញ្ញាមួយ ដែលកម្លាំងបានចុះបង្ក្រាបបទល្មើសព្រៃឈើជាច្រើន នាប៉ុន្មានថ្ងៃមកនេះ ។ យ៉ាងហោចឧកញាចំនួន ២រូប គឺ ឧកញា លឹម ប៊ុនណា ហៅខ្នា និង ឧកញា សឹង សំអុល ដែលជាអ្នកជំនួញដែលមានឈ្មោះក្នុងបញ្ជី ជាប់ទាក់ទងនឹងជំនួញឧក្រិដ្ឋកម្មឆ្លងដែនខុសច្បាប់នេះ ។
នាយឧត្តមសេនីយ៍ សៅ សុខា បានមានប្រសាសន៍នៅព្រឹកមិញថា ចាប់តាំងពីកម្លាំងបានចេញប្រតិបត្តិការភ្លាមៗក្នុងជំហានដំបូង គេបានរកឃើញវត្ថុតាងឈើខុសច្បាប់នៅកន្លែងមួយចំនួន ជាពិសេសនៅក្នុងភូមិសាស្ត្រខេត្តចំនួន៣ គឺមានខេត្តក្រចេះ មណ្ឌលគីរី និងត្បូងឃ្មុំ ។ ឈើខុសច្បាប់ទាំងឡាយនេះ ត្រូវក្រុមគណៈកម្មការជាតិកំពុងស្រាវជ្រាវរកអ្នកជាប់ពាក់ព័ន្ធ និងត្រូវគេរំពឹងថា លទ្ធផលនឹងត្រូវដឹងច្បាស់លាស់នៅថ្ងៃទី១៩ ឬ ២០ មករា ឆ្នាំ ២០១៦ នេះ ។
ខេត្តត្បូងឃ្មុំ ខេត្តក្រចេះ និងខេត្តមណ្ឌលគីរី គឺខេត្តនៃមុខសញ្ញានាំចេញចូលឈើខុសច្បាប់ចេញទៅវៀតណាម ដែលកន្លងមក ឈ្មួញជាឧកញាធំៗ បានប្រើឥទ្ធិពលលុយកាក់ កាងការដឹកឈើខុសច្បាប់នេះចេញទៅវៀតណាម ដោយមិនខ្លាចរអែងនូវច្បាប់របស់ប្រទេសជាតិឡើយ ។ នាយឧត្តមសេនីយ៍ សៅ សុខា បានមានប្រសាសន៍ក្នុងកិច្ចប្រជុំថា កម្លាំងកងរាជអាវុធហត្ថ ចាប់តាំងពីថ្ងៃទី១៥ មករានោះមក បានរុញកម្លាំងឡើងទៅតាមបន្ទាត់ព្រំដែនភ្លាមៗ ដោយសហការជាមួយកម្លាំងនៅតាមព្រំដែន ដើម្បីទប់ស្កាត់កុំឲ្យមានការឆ្លងកាត់ឈើពីកម្ពុជាទៅកាន់ប្រទេសជិតខាង ជាពិសេសវៀតណាមតែម្តង ។ លោកបានមានប្រសាសន៍ថា សភាពការណ៍ដឹកជញ្ជូនឈើប្រណិតខុសច្បាប់ក៏មានភាពស្ងប់ស្ងាត់ និងមិនមានការដឹកជញ្ជូនឈើចេញពីកម្ពុជាទៅវៀតណាមទៀតទេនាពេលនេះ ។
នៅជាមួយគ្នា នឹងការដាក់កម្លាំងបង្ក្រាបនោះផងដែរ អ្នកដែលរកស៊ីឈើ ក៏បានចាកចេញពីក្នុងព្រៃដោយនាំទាំងមធ្យោបាយដឹកជញ្ជូនឈើរាប់រយគ្រឿង ចេញពីក្នុងព្រៃនោះថែមទៀត ។