សាលារាជធានីភ្នំពេញ បានត្រៀមស្លាកសញ្ញាចរាចរណ៍ចំនួន ៥ពាន់ស្លាក ថែមទៀត ក្នុងការដាក់ពង្រាយតាមដងផ្លូវ ។ ការត្រៀមដាក់ពង្រាយស្លាកសញ្ញាទាំង ៥ពាន់នេះ គឺនៅទន្ទឹមនឹងការរិះគន់ថា រាជធានីភ្នំពេញ ដែលបានកសាងផ្លូវថ្មីៗមួយចំនួនរួចហើយ នៅមិនទាន់បានដាក់ស្លាកសញ្ញាដើម្បីការងាយធ្វើចរាចរណ៍ដល់អ្នកដំណើរឡើយ ។
ការត្រៀមពង្រាយស្លាកសញ្ញាចរាចរណ៍នេះ គឺនៅទន្ទឹមនឹងគម្រោងបំពាក់កាមេរ៉ាសុវត្តិភាពថ្មីចំនួន ៦០០គ្រឿង ទៀត តាមដងផ្លូវក្នុងរាជធានីផងដែរ ។
សាលារាជធានី នៅជាមួយនឹងគម្រោងបំពាក់ស្លាកសញ្ញា និងការបំពាក់កាមេរ៉ាថ្មី កំពុងតែព្យាយាមកាយប្រឡាយបើកមុខទឹក ដើម្បីនាំទឹកចេញក្រៅក្រុងថែមទៀត ។ រាជធានីភ្នំពេញ ក្រៅពីការរិះគន់អំពីខ្វះសញ្ញា ក៏រងនឹងការរអ៊ូរទាំពីប្រជាពលរដ្ឋថា ជាក្រុងដែលងាយរងការលិចទឹកថែមទៀត ។
អភិបាលរាជធានីភ្នំពេញ ឯកឧត្តម ប៉ា សុជាតិវង្ស បានថ្លែងថា កិច្ចប្រឹងប្រែងកាយប្រឡាយបើកមុខទឹកនេះ នឹងអាចកាត់បន្ថយការលិចលង់ដោយសារជំនន់ទឹកភ្លៀង បានពី ៧០ ទៅ ៨០% នៃតំបន់ដែលធ្លាប់លិចកន្លងមកផងដែរ ។ លោកបានមានប្រសាសន៍ទៀតថា កាលពីឆ្នាំ ២០១៥ កន្លងមក រាជធានីបានស្ថាបនាប្រពន្ធ័លូ និងផ្លូវទាំងតូចទាំងធំ បានប្រវែង ១១៧គីឡូម៉ែត្រ ក្នុងប្រវែងសរុបជាង ៦០០គីឡូម៉ែត្រ ហើយ ។ លោកបានបន្តថា សាលារាជធានីភ្នំពេញ កំពុងខិតខំស្តារប្រឡាយ ចាប់ពីផ្លូវទំនប់៧០ ដល់ទំនប់កប់ស្រូវ ដើម្បីទាញទឹកចេញពីកណ្តាលរាជធានី… ហើយនៅសប្តាហ៏ក្រោយ សាលារាជធានី នឹងដំណើរការលើកទំនប់ ២ជាន់ ធ្វើជាអាងចំរោះទឹក ដែលការពារមិនឲ្យប៉ះពាល់លើផ្នែកបរិស្ថានដល់ប្រជាពលរដ្ឋតាមបណ្តាសង្កាត់ ដែលនៅជាប់ និងអាស្រ័យផលពីបឹងកប់ស្រូវក្នុងខណ្ឌព្រែកព្នៅឡើយ ។
គួររំលឹកថា រាជធានីភ្នំពេញបច្ចុប្បន្ន មានទំហំជិត ៦៨០គីឡូម៉ែត្រក្រឡា និងមានប្រជាជនរស់នៅប្រមាណជាង ២លាននាក់ផងដែរ ។