កម្ពុជា​និង​បណ្តា​ប្រ​ទេស​៥​ ដទៃ​ទៀត ​ដែល​មាន​ទន្លេ​មេ​គង្គ​ហូរ​ឆ្លង​កាត់ គ្រោង​នឹង​រៀប​ចំ​កិច្ច​សហ​ប្រ​តិបត្តិ​ការ មេ​គង្គ ឡាន​ឆាង ​លើក​ទី​២ ​ដែល​កម្ពុជា​នឹង​ធ្វើ​ជា​ម្ចាស់​ផ្ទះ​។ កិច្ច​ប្រ​ជុំ​មេ​គង្គ ឡាន​ឆាង គឺ​សម្តៅ​ប្រ​ទេស​ដែល​ស្ថិត​តាម​ដង​ទន្លេ​មេ​គង្គ គឺ កម្ពុជា ចិន ឡាវ ថៃ មី​យ៉ាន​ម៉ា និង វៀត​ណាម​…​ ចំណែក​ទន្លេ ឡាន​ឆាង គឺ​ជា​ទន្លេ​មេ​គង្គ ផ្នែក​ខាង​លើ​ដែល​ហូរ​កាត់​ប្រ​ទេស​ចិន​។
ទន្លេ​ឡាន​ឆាង គឺ​ជា​ទន្លេ​មួយ​ដែល​ដើរ​តួ​នាទី​យ៉ាង​សំខាន់​បំផុត​ នៃ​ការ​ទទួល​របប​ទឹក​ទន្លេ​មេ​គង្គ ​ដែល​ហូរ​កាត់​តាម​ប្រ​ទេស​ទាំង​៥ ​របស់​អាស៊ាន​នេះ​។ កិច្ច​ប្រ​ជុំ​មេ​គង្គ ឡាន​ឆាង​រយៈ​ពេល​ ២​ថ្ងៃ ​ក្នុង​សប្តាហ៍​នេះ គឺ​នឹង​ក្លាយ​ជា​កិច្ច​ប្រ​ជុំ​កំពូល​មេ​គង្គ ឡាន​ឆាង​លើក​ទី​២ បន្ទាប់​ពី កិច្ច​ប្រ​ជុំ​កំពូល​ឡាន​ឆាង មេ​គង្គ លើក​ទី​១ បាន​ធ្វើ​កាល​ពី​ចុង​ខែ​មីនា​ ឆ្នាំ​២០១៦ ក្នុង​ក្រុង​សាន​យ៉ា នៃ​ប្រ​ទេស​ចិន ​។ កិច្ច​ប្រ​ជុំ​មេ​គង្គ ឡាន​ឆាង​លើក​ទី​២ រវាង​ពី​ថ្ងៃ​ទី​២២​ដល់ ​២៣​ធ្នូ ​ខាង​មុខ​នេះ នឹង​ធ្វើ​នៅ​ក្នុង​ក្រុង​អង្គរ​ខេត្ត​សៀម​រាប ដែល​នឹង​មាន ការ​ចូល​រួម​ពី​រដ្ឋ​មន្ត្រី​ការ​បរ​ទេស​ទាំង ​៦​ប្រ​ទេស​ ពី​កម្ពុជា ចិន ឡាវ ថៃ មី​យ៉ាន​ម៉ា និង វៀត​ណាម​ ។
យោង​តាម​ក្រ​សួង​ការ​បរ​ទេស កិច្ច​ប្រ​ជុំ​នឹង​គ្រោង​នឹង​ពិនិត្យ ​និង​ឯក​ភាព​លើ​ឯក​សារ​ចំនួន​៣ រួម​មានៈ
ទី១- សេចក្តី​ប្រ​កាស​ព័ត៌​មាន​រួម ​របស់​កិច្ច​ប្រ​ជុំ​រដ្ឋ​មន្ត្រី​ការ​បរ​ទេស​ នៃ​កិច្ច​សហ​ប្រ​តិបត្តិ​ការ​មេ​គង្គ ឡាន​ឆាង​លើក​ទី​២
ទី​២- បញ្ជី​តាម​ដាន​លទ្ធ​ផល​កិច្ច​ប្រ​ជុំ​កំពូល​មេ​គង្គ ឡាន​ឆាង​លើក​ទី​១​
​ទី​៣- ​គោល​ការណ៍​ទូ​ទៅ​សម្រាប់​ការ​​បង្កើត​ក្រុម​ការ​ងារ​រួម ស្តី​ពី​វិស័យ​អា​ទិ​ភាព​សំខាន់​ៗ​នៃ​កិច្ច​សហ​ប្រ​តិបត្តិ​ការ​មេ​គង្គ​ឡាន​ឆាង​ ។
ក្នុង​កិច្ច​ប្រ​ជុំ​មេ​គង្គ ឡាន​ឆាង​លើក​ទី​១ សេចក្តី​រាយ​ការណ៍​បាន​អោយ​ដឹង​ថា ប្រ​ទេស​ចិន បាន​សម្រេច​តម្កល់​មូល​និធិ​មួយ​ចំនួន​ធំ ដើ​ម្បី​ជួយ​ជំរុញ​ដល់​គម្រោង​ និង​កម្ម​វិធី​អភិ​វឌ្ឍន៍​នៅ​ក្នុង​ប្រ​ទេស​ទាំង​៥​ នៃ​ទន្លេ​មេ​គង្គ ដែល​នឹង​ជួយ​ជំរុញ​ដល់​សេដ្ឋ​កិច្ច និង​ការ​អភិ​វឌ្ឍន៍​ធន​ធាន​មនុ​ស្ស​ ដែល​ជា​កត្តា​ចាំ​បាច់​បំផុត​ ។
ប្រ​ទេស​ទាំង​៦ តាម​ដង​ទន្លេ​មេ​គង្គ ក្នុង​កិច្ច​ប្រ​ជុំ​កាល​ពី​ខែ​មីនា​ ដើម​ឆ្នាំ​នេះ ក៏​បាន​បញ្ជាក់​ផង​ដែរ​ អំពី​សក្តានុ​ពល​ទេស​ចរណ៍​ ដែល​មាន​ចំនួន​ប្រ​មាណ​ ១៥ លាន​នាក់​ ក្នុង​មួយ​ឆ្នាំ​ៗ ដែល​មក​ទស្សនា​ក្នុង​ប្រ​ទេស​តាម​ដង​ទន្លេ​មេ​គង្គ និង​ជា​ប្រ​ភព​ចំណូល​មួយ​ដ៏​សំខាន់​បំផុត រួម​ទាំង​ទំហំ​ពាណិជ្ជ​កម្ម​ប្រ​មាណ ១៩៣,៣ ប៊ី​លាន​ដុល្លារ ដែល​នឹង​ជួយ​បង្កើន​ដល់ សេដ្ឋ​កិច្ច​នៃ​បណ្តា​ប្រ​ទេស​ទាំង​៦ ថែម​ទៀត​ផង​ ។