អូស្ត្រាលីនៅ​តែបង្ហាញពី​ឆន្ទះបន្តគាំ​ទ្រដល់​អង្គជំ​នុំ​ជម្រះ​វិសា​មញ្ញ​​ក្នុងតុលាការ​កម្ពុជា​បន្តទៅទៀត  ដើម្បីជួយ​ជំរុញ​ឲ្យ​សា​លា​​​ក្តី​មួយនេះ ដំណើរកា​រទៅមុខ ក្នុងការ​សម្រេច​បានលទ្ធផល​យ៉ាងជោគជ័យ។ ​ ​លោក​ជំទាវ​ Alison Burrows ឯកអគ្គ​រដ្ឋ​ទូត​អូស្រ្តាលី​ ដែលត្រូវចប់​អាណត្តិតការ​ទូតពី​កម្ពុជា ក្នុងឱកាស​ចូលជួប​ជំរាបលា​ឯកឧត្ត​ម​បណ្ឌិត​សភា​ចារ្យ​ សុខ អាន ឧប​នាយក​រដ្ឋមន្រ្តី រដ្ឋមន្រ្តី​ទទួល​​បន្ទុកទីស្តីការ​​គណៈរដ្ឋមន្រ្តី​ នៅទីស្តីការ​គណរដ្ឋ​មន្ត្រី​ ព្រឹ​ក​ថ្ងៃទី១១  ខែមករា ឆ្នាំ២០១៦ លោកជំទាវបាន​​បង្ហាញ​ពីន្ទៈ​ក្នុងការ​​ចូលរួម ​បន្តគាំទ្រ​​ដល់​អង្គជំ​នុំជម្រះ​​​វិសាមញ្ញ​​ក្នុង​តុលាកា​កម្ពុជា​ជា ​បន្ត​ទៀត។
ឯកឧត្តម​ឧបនាយ​ករដ្ឋមន្ត្រី សុខ អាន បានថ្លែង​អំណរគុណ​ចំពោះ​​​រដ្ឋាភិបាលអូស្ត្រាលី ដែលបាន​ចូលរួម វិភាគទាន ដល់​សា​លាក្តី​ក្នុង​ពេលកន្លងមក ជាពិសេស​ពេលនេះ​ បាន​សន្យាជួយគាំទ្រ​តទៅទៀត។ ​ពាក់​ពន្ធ័​និង​សាលា​ក្តីខ្មែរ​ក្រហម​នេះ​ ឯកឧត្តមបណ្ឌិតសភាចារ្យ សុខ អាន មានប្រសាសន៍ថា សព្វថ្ងៃ​​តុលាកា​រនេះ​ ​កំពុងដំណើរការ​ទៅមុខ​យ៉ាង​ល្អ​​ គឺ​សហ​ចៅក្រម​​​ទាំងពីរ​បាន​ធ្វើការងារ​​នេះ​ជា​មួយ​គ្នាជា​ប្រក្រតី ក្នុង​ការបន្ត​នូវ​នីតិ​វិធីរ​បស់​តុលាកា​រពុំមាន​​ឧបសគ្ក​អ្វី​ឡើយ   បើ​ទោះ​បី​​មាន​​​បញ្ហាប្រឈមខ្លះៗ  ពាក់ពន្ធ័​ទៅ​នឹងជន​សង្ស័យ​ដែលកាន់​តែមាន​វ័យចាស់​ទៅៗ ហើយ​នោះ ប៉ុន្តែ​យើង​ក៍បាន ​ខិត​ខំ​​ជំរុញការងារ​នេះ​បាន​យ៉ាង​សកម្ម។
សូម​បញ្ជាក់ថា ក្នុងពេល​​កន្លង​​មក​ ​កម្ពុជា​បាន​ចូល​រួម​​វិភាគ​ទាន​យ៉ាង​ច្រើន​ដល់​អង្គជំនុំជម្រះ​វិសាមញ្ញ​​ក្នុង​តុលាកា​រកម្ពុជា​នេះ ​គឺជាប់ចំ​ណាត់​ថ្នាក់លេខ២  បន្ទាប់ពីប្រទេស​ជប៉ុនជាប់​ចំណាត់​ថ្នាក់​លេខ១ អាមេរិក​លេខ៣  និង​អូស្ត្រាលី​លេខ៤​ដែលបាន​រួម​ចំណែក​​ផ្តល់​​វិភាគទាន​ដល់ដំណើរ​ការរបស់​តុលាការ​កូនកាត់​មួយនេះ។
លោកជំទាវ​ឯកអគ្គរដ្ឋទូតអូស្ត្រាលី​ក៍បានបង្ហាញ​ពីបំណង​ក្នុងការ​បង្កើននូវ​ទំនាក់ទំនង​វិស័យទេសចរណ៍ និង​បេតិកភណ្ឌ​​រវាង​​អូស្ត្រាលី និងកម្ពុជា ឲ្យបានកាន់តែល្អ​ថែមទៀត ​ដើម្បីជួយ​ធ្វើឲ្យវិស័យ​នេះកាន់តែ​មានការ​រីកចំរើន​បន្ថែមទៀត។ គួរ​បញ្ជាក់ថា  ​ក្នុង​ពេលកន្លង​មក​​អូស្ត្រា​លី​​បាន​ជួយ​​លើវិស័យ​វប្បធម៌ គឺជួយ​លើចំណាត់​​ការផ្នែក​បេតិកភណ្ឌ​នៅ​តំបន់​ប្រាសាទ​អង្គរ ដោយបាន​ចាត់ចែង​លើ​​របៀបរៀប​​រយ​ សណ្តាប់ធ្នាប់  ក្នុង​ការជួយ​សម្រួល​អ្នក​ទេសចរណ៍​ឲ្យ​មានលំហូរ​បាន​ល្អ​បញ្ជៀស​​កុំឲ្យមានការ​កកស្ទះ​ ចរាចរ​ដើម្បីកុំ​ឲ្យបង្ករការ​ប៉ះពាល់​ដល់ ភ្ញៀវដែល​អញ្ជើញ​មក​ទស្សនាអង្គរវត្ត។
​ឯកឧត្តមបណ្ឌិតសភាចារ្យ សុខ អាន  ក្នុងនាម​រាជរដ្ឋា​ភិបាលកម្ពុជា​ បានថ្លែង​​អំណរគុណ​ចំពោះអូស្ត្រាលី ដែល​បាន​ជំរុញ​លើការ​បង្កើន​ទំនាក់ទំនង សហ​ប្រតិ​បត្តិការ​ដ៍ល្អលើ​ផ្នែកទេ​សចរណ៍ ផ្នែកបេតិកភណ្ឌ  ជាមួយ​កម្ពុជា ហើយ​ជាង​នេះ​អូស្ត្រាលីក៍​​បានទទួល​យកនិស្សិត​កម្ពុជាក្នុង​​មួយឆ្នាំៗ ចំនួន៥០នាក់ផងដែរ ​​ឲ្យទៅសិក្សានៅ​​ប្រទេសអូស្ត្រាលី។
ក្រៅពីពិភា​ក្សាលើបញ្ហា​ខាងលើ​នេះភាគី​ទាំងពីរ​ក៍បានពិភាក្សា​គ្នាដោយ​ផ្តោតលើ​កិច្ចសហប្រតិបត្តិការ វិនិយោគ ពាណិជ្ជកម្ម​ សេដ្ឋកិច្ច សំដៅ​ជំរុញ​ទំហំពាណិជ្ចកម្មរវាងប្រទេសទាំងពីឲ្យមានការរីក ធំធាត់ឡើងថែមទៀត៕​