សម្តេចតេជោហ៊ុន សែននាយករដ្ឋមន្រ្តីកម្ពុជានឹងអញ្ជើញជាអធិបតីបើកការដ្ឋានសាងសង់ព្រលានយន្តហោះអន្តរជាតិថ្មី ក្នុងខេត្តសៀមរាបនាពេលឆាប់ៗខាងមុខនេះ។ នេះបើតាមមន្រ្តីជាន់ខ្ពស់រដ្ឋលេខាធិការដ្ឋានអាកាសចរណ៍ស៊ីវិល។
ឯកឧត្តម ជា អូន អ្នកនាំពាក្យនិងជារដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិលបានមានប្រសាសន៍ឲ្យដឹង តាមទូរស័ព្ទកាលពីល្ងាចថ្ងៃទី៦ មិនាកន្លងមកថា ក្រុមការងារកំពុងរៀបចំផែនការ និងរៀបចំការដ្ឋាន ដើម្បីអញ្ជើញសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ទៅបើកការដ្ឋានសាងសង់ព្រលានយន្តហោះតម្លៃប្រមាណ ៩០០លានដុល្លារអាមេរិកនាពេលឆាប់ៗខាងមុខនេះ។
ឯកឧត្តមបានបន្តថា “ខ្ញុំមិនអាចបញ្ជាក់បានពេលវេលាជាក់លាក់ទេ តែពេលនេះក្រុមការងារសម្តេចបានរៀបចំហើយ ដូច្នេះការបើកការដ្ឋានសាងសង់ផ្លូវការនឹងចាប់ផ្តើមឆាប់ៗនេះ”។ លោកបន្តថា “ព្រលានយន្តហោះអន្តរជាតិខេត្តសៀមរាបថ្មី ជាព្រលានយន្តហោះលំដាប់អន្តរជាតិ ដែលអាចចុះចតយន្តហោះខ្នាតធំបាន ដូចគ្នានឹងព្រលានយន្តហោះអន្តរជាតិភ្នំពេញ និងព្រលានយន្តហោះកងកេង ខេត្តព្រះសីហនុក្រោយពេលពង្រីករួច”។
ឯកឧត្តម ជា អូន បានបន្តថា បច្ចុប្បន្នក្រុមហ៊ុនចិន ដែលទទួលបន្ទុកសាងសង់ព្រលានយន្តហោះថ្មី ដែលស្ថិតក្នុងស្រុកសូទ្រនិគម ខេត្តសៀមរាបកំពុងចាប់ផ្តើមដំណើរការសាងសង់ និងរៀបចំបច្ចេកទេសមួយចំនួន ដើម្បីឈានទៅពន្លឿនការសាងសង់ព្រលានយន្តហោះថ្មីនេះហើយ។
ឯកឧត្តមបន្តថា ក្រោយពេលសាងសង់ចប់ វានឹងក្លាយជាព្រលានលំដាប់អន្តរជាតិមួយ ក្នុងចំណោមព្រលានយន្តហោះលំដាប់អន្តរជាតិនានានៅកម្ពុជា។
ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីន បានមានប្រសាសន៍ថា ការសាងសង់ព្រលានយន្តហោះអន្តរជាតិថ្មីនេះ នឹងធ្វើឲ្យកម្ពុជាអាចឈានទៅមួយកម្រិតទៀត ដោយយើងរំពឹងថានឹងទទួលបានយន្តហោះចុះចតកាន់តែច្រើន ដែលនឹងរួមចំណែកទាក់ទាញភ្ញៀវទេសចរណ៍ និងសកម្មភាពពាណិជ្ជកម្មកើនឡើងបន្ថែមទៀតនាពេលអនាគត។
លោកស្រីបន្តថា “នៅពេលព្រលានយន្តហោះនេះសាងសង់ចប់ វានឹងភ្ជាប់កម្ពុជាជាមួយនឹងតំបន់ និងពិភពលោកកាន់តែសកម្មឡើង ដែលនឹងធ្វើឲ្យខេត្តសៀមរាបកាន់តែមានការរីកចម្រើនលឿនថែមទៀត”៕
