ព្រះសីហនុ៖ អភិបាលខេត្តព្រះសីហនុ ឯកឧត្តម យន្ត មីន បានមានប្រសាសន៍ថា ឯកឧត្តមសង្ឃឹមថា អ្នកវិនិយោគចិននឹងបន្តមកវិនិយោគនៅខេត្តព្រះសីហនុ កាន់តែច្រើនថែមទៀត ដោយ ឯកឧត្តមលើកឡើងពីសក្តានុពលជាច្រើនដែលខេត្តនេះមាន។
ក្នុងជំនួបជាមួយប្រតិភូទីក្រុង WU XI ដឹកនាំដោយលោក YANG LIQUN អនុប្រធានសមាគមវប្បធម៌អន្តរជាតិខេត្តជាំងស៊ូ កាលពីល្ងាចថ្ងៃទី២០ កុម្ភៈកន្លងមក ឯកឧត្តម យន្ត មីនបានជំរាបជូនពីសក្តានុពលរបស់ខេត្ត នៅឆ្នាំ២០១៨ ដោយប្រជាពលរដ្ឋក្នុងខេត្តមានប្រាក់ចំណូលកើនដល់៣.៣៧៣ដុល្លាអាមេរិក ក្នុងមនុស្សម្នាក់។ ខេត្តមានកំពង់ផែទឹកជ្រៅតែមួយគត់ នៃប្រទេសកម្ពុជា មានទំនិញឆ្លងកាត់ កុងតឺន័រចេញចូល៧៣ភាគរយ ។ ប្រជាពលរដ្ឋប្រកបមុខរបរមានដូចជា ទេសចរណ៍ ឧស្សាហកម្ម កសិកម្ម។
លើសពីនេះខេត្តព្រះសីហនុ មានឆ្នេរខ្សាច់ប្រវែង១៧៥គីឡូម៉ែត្រ និងដាក់បញ្ចូលជាសមា ជិកក្លឹបឆ្នេរស្អាតជាងគេលើពិភពលោក មានកោះចំនួន៣២ ប្រកបដោយសក្ដានុ ពល មានដូចជា ផ្កាថ្ម ជីវៈចម្រុះបាតសមុទ្រ ។
ខេត្តមានផ្លូវគមនាគមន៍៤ផ្លូវទឹក ផ្លូវគោក ផ្លូវដែក និងផ្លូវអាកាស ហើយព្រលានយន្តហោះអន្តរជាតិខេត្តព្រះសីហនុ បានដំណើរការហោះហើរទៅកាន់បរទេសកាន់តែច្រើនពីមួយថ្ងៃទៅមួយថ្ងៃ។ ជាមួយគ្នានេះប្រជាពលរដ្ឋកម្ពុជា និងប្រជាពលរដ្ឋចិនមានទំនាក់ទំនងល្អ វប្បធម៌ ទំនៀមទំលាប់ប្រពៃណីស្រដៀងគ្នា។
ឯកឧត្តម យន្ត មីនបានបន្តទៀតថា ដោយមានការគាំទ្រពីមិត្តចិន ក្នុងការអនុវត្តគោលនយោបាយផ្លូវមួយ ខ្សែក្រវាត់មួយ និងផ្លូវសូត្រសមុទ្រ ធ្វើឲ្យអ្នកវិនិយោគចិន ចាប់អារម្មណ៍មកធ្វើកាវិនិយោគនៅខេត្តព្រះសីហនុមានការកើនឡើង ពិសេសតំបន់សេដ្ឋកិច្ចក្រុងព្រះសីហនុ ដែលបានដើរតួនាទីយ៉ាងសំខាន់បង្កើនកំណើនសេដ្ឋកិច្ចជាតិ ផ្តល់ការងារ ជូនប្រជាពលរដ្ឋប្រមាណ ២ម៉ឺននាក់។
លោក YANG LIQUN អនុប្រធានសមាគមវប្បធម៌អន្តរជាតិខេត្តជាំងស៊ូ មានប្រសាសន៍ថ្លែងអំណរគុណអភិបាលខេត្ត បានជួយគាំទ្រដល់អ្នកវិនិយោចិន មកធ្វើការវិនិយោគនៅខេត្តព្រះសីហនុ ពិសេសដោយមានកិច្ចសហប្រតិបត្តិការរវាងខេត្តជាំងស៊ូ និងខេត្តព្រះសីហនុ អនុវត្តនូវនយោបាយផ្លូវមួយ ខ្សែក្រវាត់មួយរបស់ប្រធានាធិបតីចិន រយៈពេល១០ឆ្នាំកន្លងមក ទទួលបាននូវសមិទ្ធិផលជាច្រើន ហើយភាគគីទាំង២មានទំនាក់ ទំនងសេដ្ឋកិច្ច វប្បធម៌ប្រពៃណីដូចគ្នា។ លោកសង្ឃឹមថា “រដ្ឋបាលខេត្តព្រះសីហនុនិងបញ្ជូនក្រុមការងារទៅផ្សព្វផ្សាយពីសក្តានុពលទេសចរណ៍របស់ខេត្តព្រះសីហននូវខេត្តជាំងស៊ូ”៕
