ព្រះសីហនុ៖ អភិបាលខេត្តព្រះសីហនុ ឯកឧត្តម យន្ត មីន បានឲ្យដឹងថា ខេត្តព្រះសីហនុ ជាតារារះនាទិសនារតី នៃព្រះរាជាណាចក្រកម្ពុជា ក៏ប៉ុន្តែ មានការសោកស្តាយ ដោយមិនមានក្រុមហ៊ុនវិនិយោគឥណ្ឌា មកធ្វើការវិនិយោគនៅខេត្តព្រះសីហនុ ខណ:ដែលក្រុមហ៊ុនជាច្រើនបាន មកធ្វើការវិនិយោគនៅខេត្តព្រះសីហនុ ក្នុងចំណោមក្រុមហ៊ុនបរទេសមកពី ១៧ប្រទេស ភាគច្រើន គឺជាក្រុមហ៊ុនវិនិយោគមកពីប្រទេសចិន។
មានប្រសាសន៍នៅក្នុងជំនួបសម្តែងការគួរសម និងឈ្វេងយល់ពី សក្តានុពលវិនិយោគទេសចរណ៍ជាមួយ លោកស្រី Manika Jain ឯកអគ្គរដ្ឋទូត នៃស្ថានទូតឥណ្ឌា ប្រចាំព្រះរាជាណាចក្រកម្ពុជា នៅថ្ងៃទី ១១ ខែកុម្ភៈ ឆ្នាំ ២០១៩ នេះ ឯកឧត្តមអភិបាលខេត្តបានសំណូមពរដល់លោកស្រីឯកអគ្គរដ្ឋទូតឥណ្ឌា ជួយផ្សព្វផ្សាយពីសក្តានុពលរបស់ខេត្តព្រះសីហនុ មានកោះ ឆ្នេរសមុទ្រ តំបន់កសិកម្ម ឧស្សាសហកម្ម និងទេសចរណ៍ដល់ប្រជាពលរដ្ឋ និងវិនិយោគិនឥណ្ឌា មកធ្វើការ វិនិយោគនៅខេត្តព្រះសីហនុ អាជ្ញាធរនឹងជួយសម្រួល អនុគ្រោះបង្កឱកាសគ្រប់បែបយ៉ាងដល់អ្នកទេសចរ និងវិនិយោគឥណ្ឌា។
ឯកឧត្តម យន់ មីនបន្តថា ប្រទេសកម្ពុជា និងប្រទេសឥណ្ឌា ជាបងប្អូននឹងគ្នា ដូចមាននៅក្នុងរឿង (នគរគោកធ្លក)។ ដោយ សារកម្ពុជាមានសង្គ្រាមផ្ទៃក្នុង ប្រទេសឥណ្ឌា បានចូលរួមក្នុងការសម្រប សម្រួលជាអន្តរជាតិ ធ្វើឱ្យកម្ពុជាមានសុខសន្តិភាព សេរីភាព ពេញបរិបូណ៍ លើផ្ទៃប្រទេស ប្រទេសមានការអភិវឌ្ឍរីកចម្រើនយ៉ាងឆាប់រហ័ស ពិសេសការអភិវឌ្ឍយ៉ាងគំហុកនៅ ខេត្តព្រះសីហនុ ឆ្នាំ២០១៨ មានសំណង់អគារពាណិជ្ជកម្ម ខុនដូរ សណ្ឋាគារ ផ្ទះសំណាក់ធំៗប្រមាណជា២០០ កំពង់កើតឡើងជាបន្តបន្ទាប់។
លោកស្រី Manika Jain ឯកអគ្គរដ្ឋទូត នៃស្ថានទូតឥណ្ឌា ប្រចាំព្រះរាជាណាចក្រកម្ពុជា បានឱ្យដឹងថា ឆ្នាំ២០១៨ កន្លងមក រដ្ឋមន្តី្រក្រសួងការពារជាតិ ក្រសួងពាណិជ្ជកម្ម និងក្រសួងការបរទេសឥណ្ឌាបានមកធ្វើទស្សនកិច្ចនៅកម្ពុជា ដែលមានគម្រោងកិច្ចសហប្រតិបត្តិការជាច្រើនត្រូវបានចុះហត្ថលេខាផងដែរ។
លោកស្រីបន្តថា ក្នុងដំណើរ ទស្សនកិច្ចនៅខេត្តព្រះសីហនុ លោកស្រីមានគម្រោងទៅទស្សនា កំពង់ផែអន្តរជាតិ ក្រុងព្រះសីហនុ និងតំបន់មួយចំនួនទៀតក្នុងខេត្ត។ ជាមួយគ្នានោះ លោកស្រីបាន ស្នើសុំការចូលចតនាវាកងទ័ពជើងទឹកឥណ្ឌា នៅចុងខែមីនា ឆ្នាំ២០១៩ខាងមុខនេះ កន្លងមកឯកឧត្តម ក៏ធ្លាប់បានចូលរួមអបអរសាទរ នៃការចូលចតនាវាកងទ័ពជើងទឹកឥណ្ឌានៅកំពង់ផែក្រុងព្រះសីហនុ ២ដងរួចមកហើយ។
នៅឆ្នាំ២០១៧ មានអ្នកទេសចរឥណ្ឌា មកកម្សាន្តខេត្តព្រះសីហនុចំនួន ១.០២៥នាក់ ឆ្នាំ២០១៨មានចំនួន២.៥៧៨នាក់ និងឆ្នាំ២០១៩ នឹងមានការកើន ឡើងបន្ថែមទៀត៕
