ហ្វីលីពីន៖ រាជរដ្ឋាភិបាលកម្ពុជាតាមរយៈក្រសួងទេសចរណ៍ បាននឹងកំពុងជម្រុញការផ្សព្វផ្សាយពីសក្កដានុពលទេសចរណ៍របស់ខ្លួន និងទាក់ទេសចរពីទីផ្សារហ្វីលីពីន ឪ្យមកកម្សាន្តកម្ពុជាឪ្យបានកាន់តែច្រើនថែមទៀត ជាពិសេសជំរុញយុទ្ធនាការផ្សព្វផ្សាយទេសចរណ៍ កម្ពុជាៈ ព្រះរាជាណាចក្រអច្ឆរិយៈ ផ្តល់ភាពកក់ក្តៅ(Cambodia: Kingdom of Wonder-Feel the Warmth) និងផ្សព្វផ្សាយពីវេទិកាទេសចរណ៍អាស៊ាន (ATF2021)ដែលកម្ពុជានឹងទទួលធ្វើជាម្ចាស់ផ្ទះនៅឆ្នាំ២០២១ ខាងមុខនេះ។
ឯកឧត្តម គុជ បញ្ញាសា អនុរដ្ឋលេខាធិការក្រសួងទេសចរណ៍ នៅក្នុងពិពរ័ណ៍ទេសចរណ៍អន្តរជាតិ International Travel Trade Expo-ITTE Manila, Philipines 2019 នៅប្រទេសហ្វីលីពីនបានឪ្យដឹងថា កម្ពុជាបានបង្ហាញនូវមោទនភាព និងកិត្តិយស ព្រមជាមួយនឹងសកម្មភាពជំរុញផ្សព្វផ្សាយ គោលដៅទេសចរណ៍កម្ពុជាដ៏ទាក់ទាញ នៅក្នុងព្រឹត្តិការណ៍ដ៏សារសំខាន់នេះ រួមមាន៖ កម្ពុជាមានស្តង់ពិព័រណ៍ដើម្បីជម្រុញផ្សព្វផ្សាយសក្តានុពលទេសចរណ៍ ការជួបផ្ទាល់ជាមួយអ្នកទិញ និងអ្នកលក់ ប្រតិបត្តិករទេសចរណ៍ដើម្បីជំរុញអាជីវកម្ម ផលិតផល កញ្ចប់ទស្សនកិច្ច និងទេសចរណ៍។
ឯកឧត្តមបន្តថា ជាមួយគ្នានោះ កម្ពុជាបានធ្វើបទបង្ហាញអំពីសក្តានុពលសម្បូរណ៍បែប ការរីកចម្រើននៃវិស័យទេសចរណ៍ ក៏ដូចជាការធានាបានដ៏ប្រសើរនូវសុខសន្តិភាព ស្ថិរភាពសង្គម សំដៅបន្តអភិវឌ្ឍប្រទេសកម្ពុជាឲ្យមានការរីកចម្រើន ដែលមានការចាប់អារម្មណ៍យ៉ាងខ្លាំងដល់អ្នកចូលរួម និងក្រុមហ៊ុនទេសចរណ៍ហ្វីលីពីនដែលនឹងធ្វើការរៀបចំដំណើរទស្សនកិច្ចរបស់ខ្លួន មកកាន់ព្រះរាជាណចក្រកម្ពុជា។
ឯកឧត្តមបន្ថែមថា ប្រតិភូកម្ពុជាបានជួបពិភាក្សាការងារជាមួយក្រុមហ៊ុនអាកាសចរណ៍ហ្វីលីពីន ក្រុមហ៊ុនឯកជន និងប្រតិបត្តិករទេសចរណ៍ជាច្រើដើម្បីកិច្ចសហការជំរុញទេសចរណ៍កម្ពជាទៅកាន់ទីផ្សារហ្វីលីពីន និងជំរុញការទស្សនាទៅវិញទៅមក (two-way visit) រវាងប្រទេសទាំងពីរ កម្ពុជា-ហ្វីលីពីន។
ប្រទេសហ្វីលីពីនជាប្រទេសដែលលមានប្រជុំកោះដ៏ធំជាច្រើន រហូតដល់ទៅជាង៧,០០០កោះនៃមហា សមុទ្រប៉ាស៊ីហ្វិក ហើយនៅឆ្នាំ២០១៨ ប្រទេស Philipines ទទួល បានទេសចរអន្តរជាតិចំនួនប្រមាណ ៧.១ លាននាក់។ ការហោះត្រង់រវាងទីក្រុងម៉ានីល-ទីក្រុងភ្នំពេញ ដែលនឹងដំណើរការចាប់ពីថ្ងៃទី០១ ខែមេសា ឆ្នាំ២០១៩ នឹងជំរុញលំហូរភ្ញៀវទេសចរកាន់តែប្រសើរបន្ថែមទៀតចូល មកទស្សនាកម្ពុជា៕
